Siyasət

“Meydan TV işi”: Jurnalist sənədlərinin götürüldüyünü və zorakılığa məruz qaldığını deyir

27 oktyabr, 2026
99

Meydan TV

Oktyabrın 26-da Bakı Ağır Cinayətlər Məhkəməsində “Meydan TV işi” üzrə növbəti məhkəmə iclası keçirilib.
“Meydan TV”nin məlumatına görə, hakim Zaur Hacıyevin sədrliyi ilə keçirilən prosesdə şahidlərin dindirilməsi nəzərdə tutulsa da, bu, baş tutmayıb.
Təqsirləndirilən jurnalist Nurlan Libre (Qəhrəmanlı) Bakı İstintaq Təcridxanasında sənədlərinin götürüldüyünü və bunun müdafiə hüququnu məhdudlaşdırdığını bildirib. O, sənədləri yanında olmadığından şahidlərə sual verə bilməyəcəyini deyərək onların dindirilməsinə etiraz edib.
Jurnalistin sözlərinə görə, oktyabrın 18-də saxlanıldığı kamerada axtarış aparılıb. Bu zaman ittiham aktı və məhkəməyə hazırlıq üçün topladığı qeydlər də daxil olmaqla bütün sənədləri götürülüb.

Nurlan Libre iddia edib ki, sənədləri götürüldükdən sonra təcridxana rəisinin otağında fiziki zorakılığa məruz qalıb:
“İstintaq təcridxanasının rəisi Elnur İsmayılovun sifarişi ilə qaldığım kamerada ‘şmon’ elədilər, bütün sənədlərimi götürdülər - ittiham aktını, qeydlərimi. Sonra da Elnur İsmayılovun otağında zorakılığa məruz qaldım. Vəkilimi təhqir etdilər, mən də dözmədim, o ifadələri qaytardım. Ona görə döydülər”.
Jurnalist bundan sonra üç gün cərimə kamerasında (“kars”) saxlanıldığını deyib. Onun sözlərinə görə, kamera yoldaşı da cəzalandırılıb və beton döşəmədə yatmağa məcbur edilib.
“Adını qoydular ki, guya ‘şmona’ maneçilik törətmişəm, ona görə kars cəzası veriblər. Amma yalan idi. Hicabla bağlı yazdıqlarıma görə cəzalandırırdılar”, - Nurlan Libre əlavə edib.

O, sənədləri qaytarılmadan məhkəmədə özünü lazımi qaydada müdafiə edə bilməyəcəyini bildirərək prosesin təxirə salınmasını istəyib.
İclasda iştirak edən bir neçə vəkil də sənədlərin götürülməsinin təqsirləndirilən şəxsin müdafiə hüququna təsir etdiyini bildirib.
Proses zamanı həbsdə olan digər jurnalist Xəyalə Ağayeva da məhkəmə qərarının icra edilməməsinə etiraz edib.
“Məhkəmə olaraq siz mənim nikah bağlamaq barədə vəsatətimi təmin etmişdiniz. Lakin ASAN Xidmət qərarı icra eləmir”, - Xəyalə Ağayeva bildirib.

Hakim Zaur Hacıyev məhkəmənin bu barədə qərar qəbul etdiyini təsdiqləyib və vəkilin həmin qərar əsasında ASAN Xidmətə müraciət edə biləcəyini deyib.

“Meydan TV işi” üzrə növbəti məhkəmə iclası noyabrın 2-nə təyin olunub.

Bu iş üzrə 12 nəfər ittiham olunur. 2024-cü il dekabrın 6-da “Meydan TV”nin baş redaktoru Aynur Elgünəş, jurnalistlər Ramin Deko (Cəbrayılzadə), Aysel Umudova, Aytac Tapdıq, Xəyalə Ağayeva, Natiq Cavadlı və vətəndaş cəmiyyəti üzvü Ülvi Tahirov saxlanılıblar.
Sonradan “Arqument.az”ın baş redaktoru və “Meydan TV” ilə əməkdaşlıq edən Şəmşad Ağa, jurnalistlər Nurlan Libre (Qəhrəmanlı), Fatimə Mövlamlı, Ülviyyə Əli (Quliyeva) və fotoqraf Əhməd Muxtar da bu iş üzrə həbs ediliblər.
Onlar, əsasən, qaçaqmalçılıq olmaqla, bir neçə maddə üzrə ittiham olunurlar. Jurnalistlər ittihamları qəbul etmir, peşə fəaliyyətlərinə görə həbs olunduqlarını bildirirlər.


Toplum TV Azərbaycanın müstəqil xəbər platformasıdır. O, ölkədə və bölgədə baş verən siyasət, iqtisadiyyat, sosial, kriminal, gender mövzularında xəbərləri dəqiq və qərəzsiz şəkildə izləyicilərimizə çatdırır.

Şikayətlərinizi bizə göndərin: info@toplummedia.tv

Siyasət

Araşdırma: "Deutsche Bank"dan sızan sənədlərdə Azərbaycanın "çirkli pul yuma şəbəkəsi"nin adı keçir

18 noyabr 2026

Toplum TV

ABŞ prezidenti Donald Trampın sahibi olduğu şirkətlərlə Azərbaycanın "çirkli pul yuma şəbəkəsi"nin əlaqələri olduğu bildirilir.   Bu barədə noyabrın 17-də dərc olunan, müxtəlif ölkələrdən olan 200-dən çox jurnalistin ərsəyə gətirdiyi araşdırmada qeyd olunub.  Araşdırma Almaniyanın ən böyük bankı olan "Deutsche Bank"dan sızdırılan sənədlər əsasında hazırlanıb. Bankın iki işçisi 15 milyondan çox məxfi sənədi jurnalistlərə sızdırıb.  Sənədlərdən aydın olur ki, hələ 2014-cü ildə bank Trampın Azərbaycanda qeydiyyatda olan "DT Marks Baku" şirkətinə şübhəli köçürmələr barədə ABŞ hüquq-mühafizə orqanlarını xəbərdar edib. Buna nümunə kimi həmin vaxt şirkətə Danimarkanın "Danske Bank"ının Estoniya filialının adı çəkilməyən müştərisindən edilən köçürmələr göstərilib. Sonradan məhz bu filialın...
Siyasət

MBH üzvü Samir Babayevə 5 il yarım həbs cəzası verilib

18 noyabr 2026

sosial media

Müsəlman Birliyi Hərəkatının (MBH) üzvü Samir Babayev 5 il 6 ay müddətinə azadlıqdan məhrum edilib. Bu barədə hüquq müdafiəçisi Zəfər Əhmədov sosial media hesabında məlumat yayıb.  Ona qarşı Cinayət Məcəlləsinin 234.1-1-ci - satış məqsədi olmadan narkotik vasitələri və ya psixotrop maddələri qanunsuz olaraq külli miqdarda əldə etmə, saxlama, hazırlama, emal etmə və ya daşıma ittihamı irəli sürülüb.  Samir Babayev 2026-cı il martın 6-da saxlanılıb. Babayev saxlanıldıqdan sonra polis idarələrində işgəncəyə məruz qaldığını bildirib. Onun yaxınlarının sözlərinə görə, fəal saxlanılarkən mülki geyimli şəxslər tərəfindən aparılıb və ailəsi iki gün onun harada olduğunu bilməyib. Samir Babayev bundan əvvəl də narkotik ittihamı ilə...

Seçilmiş Videolar

Toplum TV loqo