Ermənistanın xarici işlər naziri Ararat Mirzoyan deyib ki, Azərbaycan prezidentinin köməkçisi Hikmət Hacıyevin Ermənistanın Azərbaycan xalqından üzr istəməsi ilə bağlı son bəyanatı sülhə “töhfə vermir”. Mirzoyan əlavə edib ki, artıq paraflanmış sülh sazişinin imzalanması üçün “başqa ilkin şərt ola bilməz”.

Mirzoyan bu fikirləri parlamentdə müxalif “Güclü Ermənistan” fraksiyasının deputatı Tiqran Abrahamyanın sualını cavablandırarkən səsləndirib.

Abrahamyan Hacıyevin bəyanatından bir gün keçməsinə baxmayaraq, Ermənistan hakimiyyətinin buna cavab vermədiyini qeyd edib və belə ritorikanın sülh prosesinə nə dərəcədə töhfə verdiyini soruşub.
Mirzoyan cavab verilməməsi ilə bağlı tənqidləri rədd edib. O bildirib ki, Ermənistan hökuməti yol boyu çətinlik və maneələrin mövcudluğunu nəzərə alaraq “sülh qurur”. Onun sözlərinə görə, Ermənistan tərəfi sülhü möhkəmləndirməyə və keçmiş qarşıdurma məntiqinə qayıtmamağa çalışır.

Mirzoyan bildirib ki, Hacıyevin sözlərinə “pafoslu və vətənpərvər” cavab verə bilərdi. Lakin o əlavə edib ki, bu məntiqlə hərəkət etsələr, “pis bir yerə” gedib çıxacaqlar.
Mirzoyan vurğulayıb ki, müharibənin yaraları hər iki tərəfdə hələ təzədir və “cəmiyyətlər barışmalıdır”.
“Biz bu münaqişəyə son qoymalı və sülh, əməkdaşlıq mərhələsinə keçməliyik. Bundan biz də faydalanacağıq, onlar da”, - Mirzoyan yekunlaşdırıb.

Son mübahisə Hikmət Hacıyevin Ermənistanın Azərbaycan xalqından üzr istəməli olduğunu bildirməsindən sonra yaranıb. Hacıyev Bakının etnik təmizləmə və azərbaycanlıların didərgin salınması kimi qiymətləndirdiyi hadisələrə görə Ermənistanın məsuliyyət daşıdığını deyib.

Oktyabrın 26-da Bakıda “Sülh dili və dezinformasiyaya qarşı mübarizə” adlı sessiyada çıxış edən Hacıyev bildirib ki, Bakı və Yerevan sülh gündəliyi ilə bağlı razılığa gəlib.

“Erməni cəmiyyətində revanşizmin təzahürləri bizi hələ də narahat edir. Eyni zamanda görürük ki, Ermənistanın mövcud rəhbərliyi ‘Real Ermənistan’ konsepsiyasını təşviq edir. Biz bunu nəzərə alırıq və hesab edirik ki, Ermənistan reallığa uyğun olmayan müəyyən tarixi yozumlar əsasında deyil, beynəlxalq səviyyədə tanınmış sərhədləri daxilində mövcud olmalıdır”, - Hacıyev deyib.

Hacıyev əlavə edib ki, sülhlə bağlı ilkin razılaşmalar artıq əldə olunub.
“Lakin əminəm ki, hər bir azərbaycanlı, xüsusilə də öz evlərindən qovulan, 30 il qaçqın və ya məcburi köçkün kimi yaşayan, etnik təmizləməyə məruz qalan insanlar Ermənistandan üzr gözləyirlər”, - o deyib.

Bu, Hacıyevin Ermənistana üzr istəmək və münaqişə dövründəki hərəkətlərinə görə məsuliyyəti qəbul etmək çağırışı etdiyi ilk hal deyil.
Hacıyev 2021-ci ildə də Ermənistanı Azərbaycan xalqından üzr istəməyə və məsuliyyəti qəbul etməyə çağırmışdı.