“Human Rights Watch” (HRW) beynəlxalq insan hüquqları təşkilatı Azərbaycan hakimiyyətini hicablı şagird və müəllimlərin məktəblərə buraxılmasını təmin etməyə, dinc etirazlara və ya məhdudiyyətlərin tənqidinə görə saxlanılanları azad etməyə çağırıb.
Təşkilat bununla bağlı oktyabrın 27-də açıqlama yayıb.

Açıqlamada bildirilib ki, yeni məktəbli geyimi qaydalarının tətbiqindən sonra ölkənin müxtəlif bölgələrində hicab taxan qızların məktəblərə girişinə icazə verilməyib. HRW bu vəziyyətin təhsil hüququna, din və ya etiqad azadlığına müdaxilə etdiyini, həmçinin ayrı-seçkiliklə bağlı ciddi narahatlıq yaratdığını vurğulayıb.

Təşkilat qeyd edib ki, Nazirlər Kabinetinin sentyabrın 21-də məktəbli formaları ilə bağlı qaydalara etdiyi dəyişikliklərdə hicabın qadağan olunması birbaşa göstərilməsə də, yeni tələblər oktyabrın 12-dən bəzi məktəblərdə hicablı şagirdlərin dərsə buraxılmaması ilə nəticələnib. Oktyabrın 6-da müəllimlər üçün qəbul olunan ayrıca geyim tələblərinin də hicablı müəllimlərə təsir etdiyi bildirilib.

HRW etirazlar zamanı çoxsaylı şəxslərin saxlanılmasına da diqqət çəkib. Təşkilatın məlumatına görə, Daxili İşlər Nazirliyi oktyabrın 12-də Bakıda 37 nəfərin saxlanıldığını açıqlayıb. Müstəqil media orqanları isə həmin gün Bakının mərkəzində yerləşən metro stansiyasının yaxınlığında 200-dən çox şəxsin saxlanıldığını bildirib. Fəalların sözlərinə görə, Nardaranda da 88 nəfər saxlanılıb.

Açıqlamada hicabla bağlı məhdudiyyətləri tənqid edən fəalların saxlanılmasına, eləcə də oktyabrın 12-də “Instagram” və “TikTok” platformalarına girişdə yaranan çətinliklərə dair məlumatlara da yer verilib.

“Azərbaycan qızların təhsil almaq imkanından məhrum edilməsinə haqq qazandırmaq üçün dünyəvi təhsil prinsipindən istifadə etməməlidir”, - HRW bildirib.

Təşkilat Azərbaycan hakimiyyətini hicablı şagird və müəllimlərin məktəblərə buraxılmasını dərhal təmin etməyə, dinc etiraz və ya tənqidə görə saxlanılan şəxsləri azad etməyə, saxlanılanların hüquqi yardıma çıxışını təmin etməyə və sosial şəbəkələrə müdaxilə barədə iddiaları araşdırmağa çağırıb.