İran Prezidenti Məsud Pezeşkianın aprelin 28-də Bakıda Azərbaycan-İran Biznes Forumunda çıxış edərkən Məhəmmədhüseyn Şəhriyardan şeir deməsi müzakirələrə səbəb olub. 

Ölkəsi ilə Azərbaycanın ticari əlaqələrindən danışan və bu əlaqələrin genişləndirilməsinin önəminə toxunan Pezeşkian Azərbaycan dilində “Heydərbabaya salam” şeirindən iki bənd oxumaqla çıxışını sonlandırıb. 

“Bir uçaydım bu çırpınan yelinən,

Bağlaşaydım dağdan aşan selinən,

Ağlaşaydım uzaq düşən elinən,

Bir görəydim ayrılığı kim saldı?

Ölkəmizdə kim qırıldı, kim qaldı?

Mən sənintək dağa saldım nəfəsi,

Sən də qeytər, göylərə sal bu səsi,

Bayquşun da dar olmasın qəfəsi,

Burda bir şir darda qalıb bağırır,

Mürüvvətsiz insanları çağırır.”

Çıxış auditoriyanın alqışları ilə qarşılanıb. 

Ölkə ictimaiyyəti və sosial şəbəkələrin Azərbaycan seqmenti Pezeşkianın Şəhriyardan şeir deməsini maraqla qarşılayıb. 

Əksəriyyət bunu yaxşı qarşılasa da, bəziləri qeyd edib ki, İran Prezidenti bu şeirlə müasir Azərbaycanın tarixi İran əraziləri olduğu mesajını verib. 

Siyasi şərhçi Şahin Cəfərli “Facebook” hesabında yazıb ki, Pezeşkian bu misraları oxumaqla “şübhəsiz ki, öz dövlətinin rəsmi mövqeyinə zidd hərəkət etmir”. 

“İran dövləti Azərbaycan Respublikasına özünün itirilmiş tarixi ərazisi olaraq baxır. Bu ərazi, yəni şimali Azərbaycan Rusiya İmperiyası tərəfindən zor gücünə - müharibə yolu ilə Qacarlardan qoparılıb. Arazı təbii sərhəd kimi ruslar müəyyənləşdirib. Bu səbəbdən İran rəsmiləri (etnik mənsubiyyətindən asılı olmayaraq) ayrılıq mövzusunda dərdlənərkən və Şəhriyar poeziyasına müraciət edərkən səmimidirlər. Onlar Gülüstan və Türkmənçay müqavilələrini İran torpaqlarının itirilməsinə səbəb olan faciə kimi qəbul edirlər”, - o qeyd edib. 

“Yəni, İran dövləti, açıq söyləməsə də, əslində vahid Azərbaycanın tərəfdarıdır - əlbəttə ki, öz tərkibində. İran prezidentinin İran dövlətini parçalayaraq vahid, müstəqil Azərbaycan dövləti qurmaq istədiyinə inanmaq ağla və məntiqə zidd olardı”, - Cəfərli əlavə edib. 

Yazıçı Ramazan Tağıyev isə İran prezidentinin bu çıxışının “Azərbaycan dövlətçiliyinə və suverenliyinə açıq təhdid olduğunu” yazıb. 

“Dövlətçilik düşüncəsi formalaşmış heç kim bu çıxışa alqış tutmaz. Əminəm ki, dünyanın heç bir dövlət başçısı gəlib Bakıda belə açıq ilhaq mesajı verə bilməzdi. Özü də yerli camaatdan və hökumət rəsmilərindən kütləvi dəstək alacaq formada”, - o qeyd edib.