2024-cü ildə narkotik ittihamı ilə saxlanılan Beyləqan sakini bu yaxınlarda məhkəmə tərəfindən bəraət alıb. 

"Azadlıq Radiosu"nun xəbərinə görə, Beyləqan rayonunun İkinci Şahsevən kəndinin sakini, 38 yaşlı İlkin Cəfərov 2024-cü ilin noyabrında kənddəki su kanalına gedərkən Dövlət Sərhəd Xidmətinin (DSX) əməkdaşları tərəfindən saxlanılıb. 

Sərhədçilər kənd sakininin ərazidəki narkotik maddəni götürmək üçün oraya gəldiyini iddia ediblər. 

İ.Cəfərov isə Lənkəran Ağır Cinayətlər Məhkəməsində ifadəsində deyib ki, Beyləqan Su Meliorasiya Sistemlərinin İstismarı İdarəsinin işçisi kimi su kanalına suyun verilməsini nizamlamaq, həm də sonra balıq tutmaq üçün həmin əraziyə gedib. 

"Elə tilovu atıb ipi bağlamaq istəyəndə sərhədçilər məni tutub, əllərimi, gözlərimi bağladılar. Təxminən 50 metr apardılar. Dedilər ki, "bura narkotik götürmək üçün gəlmisən". And-aman etdim ki, mən heç narkotik necə olur, bilmirəm, burada həmişə balıq da tuturam, mal-qara da otarıram. Məni döyməyə başladılar", - o qeyd edib. 

"Məni zastavaya gətirib yenə möhkəm döydülər. Tələb bu idi ki, tutulduğum yerə o narkotiki götürmək üçün gəldiyimi deyim. Dəhşətli işgəncələrə dözə bilmədim. Qabırğalarımı sındırdılar. Razılaşandan sonra kisəni də götürdülər, məni maşına mindirib əvvəlki yerə gətirdilər. Orada yerə tökdülər, orada şəkil, video çəkdilər", - kənd sakini əlavə edib. 

İ.Cəfərovun şikayəti əsasında tibbi ekspertiza təyin olunub. Ekspert rəyində də onun bədənində xəsarət izlərinin olması və qabırğalarının sınması qeyd olunub. 

İ.Cəfərovun işgəncəyə məruz qalması haqda şikayətinə və ekspertizanın xəsarətləri təsdiqləyən rəyinə baxmayaraq, prokurorluq cinayət işi açmaqdan imtina edib. 

Sərhədçilər isə ifadələrində iddia ediblər ki, onlara həmin əraziyə narkotik maddə qoyulması barədə məlumat daxil olub. Onların sözlərinə görə, onlar İ.Cəfərovun paltarlarını soyunub kanalı keçdiyini, torba ilə geri qayıtdığını görüblər. 

Hakimlər kollegiyası ifadələr və başqa sübutları araşdırandan sonra İ.Cəfərovun dediklərini daha inandırıcı hesab edərək onun haqqında bəraət hökmü çıxarıb.