ABŞ-nin Gürcüstandakı səfiri Robin Danniqan Gürcüstan hökumətinin ABŞ Prezidenti Donald Trampın administrasiyasına təhqiramiz məktub göndərdiyini deyib. 

Səfir bunu “Azadlıq Radiosu"nun gürcü xidmətinə iyulun 7-də yayımlanan müsahibədə bildirib. 

Şəxsi səbəblərə görə bu ay vəzifəsindən ayrılacaq Danniqan deyib ki, o, Trampın yanvar ayındakı inauqurasiyasından qısa müddət sonra Vaşinqtona gedib. Onun məqsədi yeni administrasiyanın “Gürcüstanla bağlı siyasəti barədə danışmaq” və “Gürcüstan hökumətinə ilk mesajın nə olması barədə təlimat almaq” olub. 

Vaşinqtondan təlimatlarla qayıdan səfir mart ayında Gürcüstanın xarici işlər naziri Maka Botçorişvili ilə görüşüb. Danniqanın dediyinə görə, o, həmin görüşdə “çox aydın şəkildə Gürcüstanla münasibətlərimizi yenidən düzgün məcraya qaytarmaq üçün Gürcüstan hökumətinin ata biləcəyi iki-üç addımı” izah edib.

“İlk addımlardan biri anti-Amerika ritorikasına son qoymaq olardı. ABŞ haqqında həqiqətə uyğun olmayan fikirlər səsləndirməyə son qoymaq lazımdır. [Hakimiyyətdə olan “Gürcü Arzusu” partiyasının] ABŞ haqqında dediyi bir çox şeylər həqiqəti əks etdirmir.  Guya biz burada ikinci cəbhə açmağa çalışmışıq — bu, doğru deyil”, - deyə Danniqan Qərbin Gürcüstanı Rusiyaya hücum etməyə sövq etdiyi barədə tez-tez təkrarlanan konspiralogiya nəzəriyyəsinə işarə edib.

“Guya mənim sələfim burada inqilab törətməyə çalışıb — bu da doğru deyil. Guya bizim strateji tərəfdaşlığımız yalnız kağız üzərində mövcuddur — bu da həqiqət deyil. Guya mən hökumətim tərəfindən geri çağırılıram — bu da həqiqət deyil. Mən bu siyahını çox uzada bilərəm”, - o əlavə edib.

Səfirin dediyinə görə, xarici işlər naziri ilə görüşdən bir neçə gün sonra o, “Gürcü Arzusu”ndan Trampa ünvanlanmış, “təhqiramiz və qeyri-ciddi bir məktub” alıb. O, məktubun detallarını açıqlamayıb. 

Danniqan məktubun Vaşinqton tərəfindən “olduqca pis” qəbul edildiyini deyib. 

Onun sözlərinə görə, bunun ardınca Danniqan “Gürcü Arzusu”nun milyarder qurucusu və keçmiş baş nazir Bidzina İvanişvili ilə görüşmək üçün müraciət edib, lakin İvanişvili bu görüşdən imtina edib. Səfir izah edib ki, ona ABŞ-nin cavab mesajının hazırki Baş nazir İrakli Kobaxidzeyə yox, xüsusi olaraq İvanişviliyə çatdırması tapşırılıb. 

“Çünki düşünürəm ki, dünyada əksər insanlar başa düşür ki, hökuməti əslində Bidzina İvanişvili idarə edir”, - o qeyd edib. 

May ayında Kobaxidze Tramp administrasiyasına ictimai məktub göndərib. O, məktubda ABŞ ilə ölkəsi arasında “yüksək səviyyəli ünsiyyətin olmamasından” şikayətlənib.

Parlament sədri Şalva Papuaşvili Danniqanın müsahibəsi ilə bağlı deyib ki, “Prezident Tramp tərəfindən təbliğat vasitəsi kimi ifşa olunan “Azadlıq Radiosu” istefada olan səfirin müsahibəsini yayır”. “Nə səfir, nə də həmin media orqanı bizim üçün maraqlı deyil”, - o əlavə edib.