ABŞ vitse-prezidenti Cey Di Vens Ukraynanın NATO-ya üzv qəbul edilməsinin əleyhinə olduğunu bildirib.
Vens bu barədə “2WAY” portalına müsahibəsində danışıb.
“Ukrayna NATO-nun üzvü deyil. Düşünmürəm ki, onlar NATO-ya üzv olmalıdırlar”, - vitse-prezident deyib.
O, Ukraynanı ABŞ-nin müttəfiqi adlandırmaqdan da çəkinib. Vensin sözlərinə görə, Kiyev Vaşinqtonun müəyyən mənada tərəfdaşıdır, lakin iki ölkənin maraqları hər zaman üst-üstə düşmür.

Vitse-prezident buna nümunə kimi Ukraynanın Rusiyanın neft emalı müəssisələrinə endirdiyi zərbələri göstərib.

“Ukraynanın Rusiya dizel yanacağı istehsalı obyektlərinə zərbələr endirməsini və bunun amerikalılar üçün enerji qiymətlərini artırmasını düzgün hesab edirəmmi? Xeyr”, - Vens bildirib.

O, ABŞ-nin Ukrayna ilə müxtəlif istiqamətlər üzrə əməkdaşlığı davam etdirəcəyini, lakin Kiyevin Rusiyanın enerji infrastrukturuna hücumları dayandırmalı olduğunu qeyd edib.

“Bildiyimə görə, bizim Ukrayna ilə rəsmi müttəfiqlik münasibətlərimiz yoxdur”, - ABŞ vitse-prezidenti əlavə edib.

Ukrayna NATO üzvü olmasa da, onilliklərdir alyansla əməkdaşlıq edir. NATO üzv ölkələrinin liderləri dəfələrlə Ukraynanın gələcəyinin alyansla bağlı olduğunu bəyan ediblər. Qurumun mövqeyinə görə, üzvlər arasında razılıq əldə edilərsə və zəruri şərtlər yerinə yetirilərsə, Ukraynaya üzvlük dəvətinin göndərilməsi məsələsinə baxıla bilər.

Ukrayna prezidenti Volodimir Zelenski bir gün əvvəl Vaşinqtonun Kiyevə münasibətdə bəzi qərarlarının “izahı çətin” olduğunu bildirib. O, Rusiyanın neft emalı zavodlarına zərbələrin 30 gün dayandırılması qarşılığında Ukraynanın hava hücumundan müdafiəsi üçün “Patriot” raketlərinin verilməsini təklif etdiyini deyib.

Ukrayna tərəfi hələlik Vensin bu açıqlamasına münasibət bildirməyib.

Ukrayna prezidenti Volodimir Zelenski isə bir gün öncə Vaşinqtonun Kiyevə münasibətdə bəzi qərarlarının “izahı çətin” olduğunu bildirib. O, Rusiyanın neft emalı zavodlarına zərbələrin 30 gün dayandırılması qarşılığında Ukraynanın hava hücumundan müdafiəsi üçün “Patriot” raketlərinin verilməsini təklif etdiyini deyib.