Rəsmi Moskva Ukrayna ilə müvəqqəti atəşkəs ideyasını rədd edir.

Bunu Rusiya Prezidentinin köməkçisi Yuri Uşakov deyib.

Onun fikrincə bu, Ukrayna hərbçilərinə müvəqqəti möhlət verməkdən və onların yenidən qruplaşmasına şərait yaratmaqdan başqa bir şey deyil.

O, həmçinin Rusiyanın uzunmüddətli sülh nizamlanmasına can atdığını və Rusiya ilə ABŞ arasında normal fikir mübadiləsinin sakit şəkildə getdiyini bildirib.

Uşakovun sözlərinə görə, ABŞ anlayıb ki, Ukraynanın NATO-ya üzvlüyündən söhbət gedə bilməz.

****

Martın 13-ə keçən gecə Rusiya ordusu Ukraynanın Dnipropetrovsk bölgəsində yaşayış yerlərinə çoxsaylı dron hücumları edib. 

Nəticədə mülki əhalidən yaralananlar var. 

Hücum Ukrayna və ABŞ-ın Rusiyaya atəşkəs təklif etməsinə təsadüf edir. 

Dnipropetrovsk regionunun hərbi idarəetmə üzrə rəhbəri Serhiy Lusak “Telegram” kanalında xəbər verib ki, dron hücumları mülki infrastruktura zərər vurub. 

Dnipro şəhərində bir neçə yaşayış binasına ziyan dəyib və yanğın baş verib. 

O deyib ki, 52 yaşlı qadın yaralanıb və xəstəxanaya yerləşdirilib. 

Oxşar fəsadlara Samarovski rayonunda da rast gəlinib. Nikopol regionunda isə 64 yaşlı qadın yaralanıb. 

Bundan bir gün əvvəl Rusiya ordusu Odessa daxil olmaqla bir sıra Ukrayna regionlarına da dronlarla hücum edib. 

Hadisə Ukraynanın martın 11-də ABŞ diplomatları ilə danışıqlardan sonra Rusiya ilə müvəqqəti atəşkəsə razılaşmasına təsadüf edir. 

Kremlin atəşkəs təklifini nəzərdən keçirdiyini desə də, eyni vaxtda Rusiya Prezidenti Vladimir Putin Ukrayna ordusunun bir hissəsinə nəzarət etdiyi Kursk regionuna səfər edib, komandirlərlə görüşüb. 

Martın 13-ü “Reuters” xəbər agentliyi adı çəkilməyən mənbələrə əsasən bildirib ki, son həftələr ərzində Rusiya diplomatları ABŞ-dan olan həmkarlarına üzbəüz və onlayn görüşlərdə Rusiyanın müharibəni bitirmək üçün tələblərinin siyahısını təqdim ediblər. Tələblərin nə olduğu açıqlanmır. 

Martın 12-i ABŞ Prezidenti Donald Tramp jurnalistlərə deyib ki, ölkəsinin nümayəndə heyəti atəşkəs təklifini müzakirə etmək üçün Rusiyaya yola düşməyə hazırlaşır. 

O bildirib ki, Rusiyaya təzyiq edə bilər, lakin hələ ki buna ehtiyac görmür.