ABŞ dövlət katibi Marko Rubio ölkəsinin də üzv olduğu Şimali Atlantik Müqavilə Təşkilatını (NATO) tənqid edib.

O, martın 31-də “Fox News” telekanalına müsahibəsində NATO-ya üzv ölkələrin ABŞ-yə İrana qarşı hərbi əməliyyatlarda kömək etmədiyini bildirib. 

“Əgər indi NATO alyansının hərbi bazalarından Amerikanın maraqlarını müdafiə etmək üçün istifadə edə bilməyəcəyimiz bir nöqtəyə çatmışıqsa, deməli, NATO birtərəfli bir küçədir. Deməli, NATO sadəcə Avropanı müdafiə etmək üçün Avropada qoşunlarımızın olmasından ibarətdir. Heç onlardan hava hücumları keçirmələrini istəmirik. Amma onların hərbi bazalarından istifadə etməyimizə icazə vermələrini istədiyimiz zaman onların cavabı "yox"dur? Bəs niyə NATO-dayıq?”, - Rubio sual edib. 

Dövlət katibinin sözlərinə görə, İranla münaqişə başa çatdıqdan sonra ABŞ-nin NATO ilə münasibətlərini “yenidən nəzərdən keçirməli olacağına şübhə yoxdur”. 

“NATO-nun ölkəmiz üçün dəyərini yenidən nəzərdən keçirməli olacağıq. Nəticə etibarilə, bu, prezidentin verəcəyi bir qərardır. Amma təəssüf ki, düşünürəm ki, bir müddətdir ölkəyə yaxşı xidmət edən bu alyansın hələ də bu məqsədə xidmət edib-etmədiyini, yoxsa indi Amerikanın sadəcə Avropanı müdafiə etmək mövqeyində olduğu, lakin müttəfiqlərimizin köməyinə ehtiyac duyduğumuz zaman baza hüquqlarımızı və uçuşlarımızı rədd edəcəkləri birtərəfli bir küçəyə çevrildiyini yenidən araşdırmalı olacağıq. Düşünürəm ki, bunlar verməli olduğumuz qanuni suallardır və bu münaqişə bitdikdən sonra bunlar çox diqqətlə araşdırılmalıdır”, - o əlavə edib. 

Eyni gündə prezident Donald Tramp da “Truth Social” platformasında müttəfiq ölkələri İrana qarşı münaqişədə ABŞ və İsrailə yardım etmədiklərinə görə tənqid edib. 

O, müttəfiq ölkələrə xitabən yazıb ki, ABŞ “həmişə onlara kömək etməyəcək və özlərini müdafiə etməyi öyrənməlidirlər”. 

Martın 30-da İspaniya hava məkanını ABŞ hərbi təyyarələrinə bağladığını xəbər verib. Bir gün sonra isə İtaliyanın da Sicilya adasındakı bazasına ABŞ təyyarəsinin enməsinə icazə vermədiyi xəbəri yayılıb. 

Fevralın 28-dən bəri ABŞ və İsrail İrana qarşı havadan hücumlar həyata keçirir. İran isə cavab olaraq İsrailə və ABŞ hərbi bazalarının yerləşdiyi Fars körfəzi ölkələrinə raket və dron zərbələri endirir.