Cənubi Koreya iyul və avqust aylarında Rusiyaya əsasən dizel olmaqla 176 min tondan çox yanacaq tədarük edib.

Bu barədə Britaniyanın “The Guardian” nəşri liman sənədləri və gəmilərin hərəkət məlumatlarına əsaslanan araşdırmasında yazıb.

Məlumata görə, iki ay ərzində yeddi tanker Rusiyaya 14 səfər edib. Bu tankerlərdən üçü Böyük Britaniya və Avropa İttifaqının sanksiyaları altındadır.

Nəşr qeyd edir ki, bəzi gəmilər limandan çıxarkən təyinat məntəqəsi kimi Yaponiya və ya Sinqapuru göstərib, daha sonra isə Rusiyanın Vladivostok limanına istiqamətlənib.

Araşdırmaya əsasən, “Layla” tankeri Cənubi Koreyanın Ulsan limanından Vladivostoka iki səfər zamanı ümumilikdə 57 min ton dizel aparıb. Gəmi ikinci səfərindən əvvəl təyinat məntəqəsi kimi Yaponiyanın Niiqata limanını göstərib.

Sanksiyaya məruz qalan “Astoria” tankerinin də Yaponiyaya getdiyini bildirdiyi, lakin sonradan Vladivostoka çatdığı deyilir. Digər tanker - “Chongchon” isə Yosu limanı yaxınlığında dənizdə başqa gəmidən təxminən 26 min ton yanacaq qəbul etdikdən sonra, sənədlərdə Sinqapur göstərilsə də, Vladivostoka yönəlib.

Liman sənədlərindən yanacağın satıcısını və sahibini müəyyənləşdirmək mümkün olmayıb. “Kpler” analitik şirkətinin məlumatına görə, Rusiyaya gətirilən neft məhsullarının alıcıları arasında “Rosneft” və NNK qrupu da var.

CREA-nın “Kpler” məlumatları əsasında hesablamasına görə, Rusiya avqustda dəniz yolu ilə 368 min ton neft məhsulu idxal edib. Bu, Rusiyanın Ukraynaya qarşı genişmiqyaslı müharibəyə başlamasından bəri ən yüksək aylıq göstəricidir. Bunun 112 min tonu, yəni 31 faizi Cənubi Koreyanın payına düşüb.

“The Guardian” tədarükün artmasını Ukrayna dronlarının zərbələrindən sonra Rusiya neft emalı zavodlarında yaranan fasilələrlə əlaqələndirir. Beynəlxalq Enerji Agentliyinin məlumatına görə, Rusiyada neft emalı iyunda 20 ildən çox müddətin ən aşağı səviyyəsinə düşüb, dizel istehsalı isə illik müqayisədə təxminən 30 faiz azalıb.