Rusiya Silahlı Qüvvələri iyunun 2-nə keçən gecə Ukraynaya 73 raket və 656 pilotsuz uçuş aparatı ilə hücum edib. Ukrayna Hərbi Hava Qüvvələrinin məlumatına görə, hava hücumundan müdafiə sistemləri 40 raket və 602 dronu məhv edib.

Kiyev meri Vitali Kliçkonun sözlərinə görə, Rusiyanın hücumu nəticəsində şəhərdə azı 4 nəfər ölüb, 63 nəfər yaralanıb. Şəhərin müxtəlif rayonlarında yaşayış binaları, poliklinika, yanacaqdoldurma məntəqəsi, anbarlar və avtomobillər zərər görüb, bir neçə yerdə yanğın baş verib.

İlkin məlumata görə, Dnepr şəhərində 6 nəfər ölüb. Daha sonra Ukrayna Daxili İşlər Nazirliyi ölənlərin sayının 9-a çatdığını açıqlayıb. Hücum nəticəsində 33 nəfər yaralanıb. Yaşayış binaları, müəssisə, yanğınsöndürmə hissəsi və avtomobillər zədələnib.

Ukrayna rəsmilərinin məlumatına görə, Xarkov vilayətində də 14 nəfər yaralanıb. Rusiya qüvvələrinin endirdiyi kombinə edilmiş zərbələr nəticəsində yaşayış evləri, təsərrüfat tikililəri, qarajlar və digər mülki obyektlərə ziyan dəyib.

Ukraynanın insan hüquqları üzrə müvəkkili Dmitro Lubinets “X” platformasında yazıb: “Rusiya Ukraynanın mülki əhalisinə qarşı terrorunu davam etdirir. Bu hücumları dayandırmaq üçün dünya hərəkətə keçməlidir. Gecikdirilən hər gün insan həyatına başa gəlir”.

Ukrayna prezidenti Volodimir Zelenski bir gün əvvəl mümkün genişmiqyaslı hücumla bağlı xəbərdarlıq edib. “Rusiyanın zərbələri ilə bağlı kəşfiyyat xəbərdarlıqları qüvvədə qalır. Kütləvi hücum mümkündür. Onlar buna hazırlaşıblar”, - Zelenski bildirib.

Rusiya ötən həftə Kiyevdə Ukrayna ordusuna aid obyektlərə və qərar qəbuletmə mərkəzlərinə qarşı “sistemli zərbələr” endirəcəyini bildirib və xarici vətəndaşları şəhəri tərk etməyə çağırıb. Moskva buna səbəb kimi ötən ay Rusiyanın nəzarətində olan Luqansk vilayətində yataqxanaya edilən dron hücumunu göstərir. Həmin hücum nəticəsində 21 nəfərin öldüyü bildirilir. Ukrayna isə hadisə ilə əlaqəsini inkar edir.

Rusiya 2022-ci ilin fevralında Ukraynaya qarşı genişmiqyaslı işğala başlayıb. Münaqişənin dayandırılması istiqamətində aparılan diplomatik səylər isə indiyədək nəticəsiz qalıb.