2025-ci ilin sonunda Azərbaycan ilk dəfə olaraq Ermənistanla ticarətə başladı. 

Dekabrın 19-da Ermənistana ümumi həcmi təxminən 1300 ton olan Aİ-95 markalı benzin ixrac edildi.  

Yanvarın 7-də isə Azərbaycan Ermənistana yanacağın ikinci partiyasını - min ton Aİ-92 markalı benzin, eyni həcmdə dizel yanacağı və 1800 ton Aİ-95 markalı benzin tədarük edib.

Azərbaycan tərəfi bildirib ki, neft məhsulları Ermənistana beynəlxalq bazar qiymətləri ilə satılır və ixrac “tamamilə kommersiya xarakteri” daşıyır.

Enerji məsələləri üzrə mütəxəssis Rauf Məmmədovun “Toplum TV”-yə dediyinə görə, satılan məhsulların həcmindən ixracatın gəlirləri artırmaq məqsədini güdmədiyi aydın olur. 

“Bu, daha çox iki ölkə arasında ticarət əlaqələrinin formalaşması məqsədi güdür. İndiyədək nəql edilmiş məhsulların həcmi göstərir ki, burada məqsəd mənfəət güdmək deyil. İxrac edilən əsas məhsul Aİ-95 benzini olub ki, bunun özü Azərbaycanda kiçik həcmdə istehsal olunur”, - o qeyd edib. 

Ekspertin sözlərinə görə, gələcəkdə Azərbaycan Ermənistana xam neft ixrac edərsə, gəlirlərini artırmaq məqsədi güdə bilər. 

“Lakin Ermənistanın neft tələbatı və istehlakı yüksək olmadığına görə, Avropa ölkələri və ya Çinə satışla müqayisədə burada çox yüksək gəlirlərdən söhbət gedə bilməz”, - o əlavə edib. 

Azərbaycanın Ermənistana neft məhsulları ixracı hər iki ölkədə birmənalı qarşılanmayıb. Sosial şəbəkələrdə azərbaycanlı istifadəçilər Ermənistanın benzindən hərbi məqsədlər üçün istifadə edəcəyini, erməni istifadəçilər isə Azərbaycanın ticarətdən varlanacağını güman edərək öz hökumətlərini tənqid ediblər. 

Ermənistan baş naziri Nikol Paşinyan da yanvarın 12-də sosial media hesabında etdiyi videomüraciətdə bu tip tənqidlərə münasibət bildirib. 

“Hər iki narahatlıq əsassızdır, çünki Azərbaycanla Ermənistan arasında sülh bərqərar olub, bu sülh tədricən getdikcə daha institusional xarakter alacaq və bu cür narahatlıqlara sadəcə olaraq yer yoxdur", - o vurğulayıb.

Milli Məclisin İnsan hüquqları komitəsinin sədri Zahid Oruc “Toplum TV”-yə deyib ki, Ermənistandakı tənqidi səslər “düşmənçilik sindromundan” əziyyət çəkir və “xarici qüvvələrin təsiri ilə” qabardılır, lakin ixracat əməliyyatına müsbət yanaşanlar da var. 

“Müsbət yanaşanlar bunu nadir hallarda ictimai şəkildə bəyan edirlər, bu da yəqin ki, hədəf seçilmək istəməmələri ilə bağlıdır. Bu da başadüşüləndir. Lakin müharibəni uduzmuş Paşinyanı hələ də hakimiyyətdə saxlayan məhz sülh amilidir”, - o əlavə edib.