“Abzas işi” üzrə həbsdə olan iqtisadçı və “Azadlıq Radiosu"nun jurnalisti Fərid Mehralızadə dövlət ittihamçısının məhkəmədən ona 12 il həbs cəzası istəməsinə münasibət bildirib. 

Mehralızadə həbsdən “Azadlıq Radiosu"na yazaraq bildirir ki, son məhkəmə prosesində prokuror Rauf Malışov onun barəsindəki ittihamın sübuta yetirildiyini deyərkən sadəcə bir "sübut"dan - onun xarici ölkələrə səfər etməyindən söz açıb. 

“Söhbət xaricdən qayıdarkən ölkəyə xarici valyuta gətirdiyimi sübut edən hansısa sənəd, görüntü, yazışma və ya hər hansı bir maddi sübutdan getmir. Sadəcə olaraq Azərbaycandan başqa ölkəyə getməyimdən gedir. Bu baxımdan, məndə belə təəssürat yaranır ki, həbsimi sifariş edən dövlət qurumu Dövlət Turizm Agentliyidir. Ölkədaxili turizmə az töhfə verdiyim üçün məni cəzalandırır", – o qeyd edib.

İqtisadçı, həmçinin, prokurorun məhkəmədən onun avtomobilinin müsadirə olunmasını istəməsinə də toxunub. O, bu tələbi absurd sayıb. 

““Cinayət yolu ilə əldə etdiyim” vəsait hesabına aldığım avtomobilin xaricdən sifarişi üçün ödədiyim vəsait isə cəmi 7 min 800 dollardır, təxminən 13 min 300 manat. Bu məbləğ mənim təxminən üç aylıq gəlirimə bərabərdir və mən 2019-cu ildən rəsmi əmək müqaviləsi əsasında çalışmışam. Prokuror Malışovun təxəyyüllünə heyran olmamaq əldə deyil. Bir daha xəbərdarlıq edirəm: Xarici ölkələrə səfər edərkən və avtomobil alarkən diqqətli olun. Bu sizin 12 ilədək həbs olunmağınıza səbəb ola bilər", – F.Mehralızadə yazır.

Mayın 20-də prokuror "Abzas Media"nın direktoru Ülvi Həsənlinin, araşdırmaçı jurnalist Hafiz Babalının və "Azadlıq Radiosu"nun jurnalisti Fərid Mehralızadənin 12 il, "Abzas Media"nın baş redaktoru Sevinc Vaqifqızının, koordinatoru Məhəmməd Kekalovun, jurnalistlər Nərgiz Absalamovanın və Elnarə Qasımovanın isə 11 il azadlıqdan məhrum edilməsini istəyib.

Təqsirləndirilən şəxslər ilkin olaraq qaçaqmalçılıq da daxil olmaqla bir neçə maddə üzrə ittiham edilirlər.

Jurnalistlər korrupsiya araşdırmaları və fəaliyyətlərinə görə cəzalandırıldıqlarını bildirirlər.