Baş Prokurorluq, Daxili İşlər Nazirliyi və Dövlət Təhlükəsizliyi Xidməti mayın 13-də Gəncə şəhərində xəstəxanada vəfat edən 18 yaşlı Elgün İbrahimov haqqında bəyanat yayıb. 

Bəyanatda bildirilir ki, istintaq İbrahimovun hündürlükdən yıxılaraq aldığı çoxsaylı xəsarətlərdən ölməsi qənaətinə gəlib. 

“Cinayət işi üzrə bütün fərziyyələr, o cümlədən mərhumun intihar etməsi, ehtiyatsızlıqdan yıxılması və ya ona ağır bədən xəsarəti yetirilməsi nəticəsində ölümün baş verməsi kimi hallar yoxlanılıb. İstintaqın hazırkı mərhələsində əldə edilmiş sübutlarla, yəni, şahid ifadələri, hadisə yerinə, müşahidə kameralarına baxış, meyitin xarici və daxili müayinə edilməsi, telefon məlumatları, məhkəmə-genetik, məhkəmə-tibbi və digər ekspertizaların rəyləri və başqa dəlillərlə müəyyən edilmişdir ki, Elgün İbrahimova hər hansı kənar şəxs və ya şəxslər tərəfindən xəsarət yetirilməyib, ona qarşı heç bir zorakı hərəkətlərə yol verilməyib, o, hündürlükdən yıxılmaq nəticəsində aldığı çoxsaylı xəsarətlərdən ölüb”, - bəyanatda deyilir. 

Hüquq-mühafizə orqanları iddia edib ki, İbrahimov mayın 12-də axşam saatlarında dostları ilə restoranda yeyib-içib və onlardan ayrılaraq, marketdən 2 qutu siqaret alaraq Gəncə Texnologiya Universitetinin yataqxanasının 5-ci mərtəbəsində eyvana çıxıb. 

“Orada bir neçə siqaret çəkmiş və eyvandan torpaqla örtülmüş sərt səthi olan həyətə yıxılaraq çoxsaylı xəsarətlər almış, saat 22:52-də ərazidə olan gözətçi tərəfindən yerdə yaralı vəziyyətdə aşkar edilərək təcili tibbi yardım avtomaşını vasitəsilə xəstəxanaya təxliyə edilib, may ayının 13-də almış olduğu xəsarətlərdən xəstəxanada ölüb”, - məlumatda qeyd olunub. 

İbrahimovun ailəsi onun döyülərək xəsarətlər aldığını vurğulayırdı. Hadisə yerindən çəkilən və sosial şəbəkələrdə paylaşılan videoda da təcili tibbi yardım işçisinin “bunu möhkəm döyüblər” dediyi eşidilir. 

Hüquq-mühafizə orqanları “mediadan, sosial şəbəkə istifadəçilərindən və ictimai fəallardan bu məsələdə yüksək həssaslıq göstərmələrini, istintaqın gedişinə mane ola biləcək və cəmiyyətdə çaşqınlıq yarada biləcək informasiyaları yaymamalarını” xahiş edib.