Azərbaycan Muay Tay Federasiyasının rəhbəri, kikboksinq və muay tay üzrə 9 qat dünya çempionu Araz Musayev mayın 28-də Türkiyənin Antalya vilayətində, Kəmər rayonunda sui-qəsdə məruz qalıb. 

Sosial şəbəkələrdə yayılan, təhlükəsizlik kamerası görüntüsünü əks etdirən videoda iki nəfərin bıçaqla Musayevin boynuna zərbə endirdiyi görünür. 

Türkiyə mətbuatı hadisə ilə əlaqədar iki Azərbaycan vətəndaşının Antalya Hava Limanında saxlanıldığını yazıb. 

“Tibbi heyətin ilkin müdaxiləsindən sonra Musayev təcili yardım maşını ilə xəstəxanaya aparılıb, müalicəsi davam edir”, - “İhlas” xəbər agentliyi yazıb. 

Musayev Antalyaya bu şəhərdə keçirilən muay tay üzrə dünya çempionatında iştirak edən azərbaycanlı idmançı heyətinin başçısı kimi gəlib. 

O, vurulduqdan sonra “Unikal.az” saytına açıqlamasında iddia edib ki, sui-qəsdçilər Azərbaycan Kikboksinq Federasiyasının rəhbərliyi tərəfindən göndərilib. 

Musayev sui-qəsdə məruz qaldığı gün də daxil olmaqla, çempionatın keçirildiyi hər gün “Facebook” səhifəsində Azərbaycan Kikboksinq Federasiyası və Gənclər və İdman Nazirliyi rəsmilərini tənqid edib. 

Mayın 28-də paylaşdığı bir videoda o deyir ki, Gənclər və İdman Nazirliyinin şöbə müdiri Elnur Məmmədov Antalyaya gələn muay tay idmançılarının “qarşısını almaq istəyir”. 

“Elnur Məmmədov Kikboksinq və Uşu Sanda Federasiyalarının rəhbərlərini bura göndərib muay tay idmançılarını Kikboksinq Federasiyasının tərkibinə qatmaq istəyir. Dünya Muay Tay Federasiyası isə kikboksinq idmançılarının Muay Tay Federasiyası nəzdində çıxış etməli olduğuna qərar verdi. Elnur Məmmədov kimi rəsmilər idmançılarımızı üz-üzə qoymaq istəyirlər. Kikboksinq Federasiyasının arxasında çox güclü bir insan durur, bizim arxamızda isə cənab prezident”, - Musayev qeyd edib. 

Azərbaycan Kikboksinq Federasiyasının fəxri prezidenti Adil Əliyevdir. O, həmçinin, Suraxanı Rayon İcra Hakimiyyətinin başçısı və Milli Məclisin keçmiş sədr müavinidir. 

Musayev mart ayında “TikTok” şəbəkəsində yayımladığı videoda deyib ki, Əliyev onu yanına çağıraraq Muay Tay Federasiyasını əlindən almaq istəyib. 

“Mən isə ona dedim ki, Muay Tay Federasiyası ictimai birlikdir və rəhbərliyi seçkilər əsasında seçilir. O da dedi ki, ona seçki-filan maraqlı deyil və Muay Tay Federasiyası onun olmalıdır. Bundan sonra o, müxtəlif media orqanlarında məqalələr çap etdirdi ki, guya mənim əldə etdiyim bütün nailiyyətlər saxtadır”, - Musayev videoda bildirir. 

Musayevin vurulması barədə “Qafqazinfo” və başqa hökumətyönlü saytlarda gedən xəbərlərdə iddia olunur ki, o, türkiyəli idmançılarla mübahisə zəmnində vurulub. 

Hadisəni əks etdirən videogörüntüdə isə vurulma anına qədər hər hansı mübahisə elementləri müşahidə olunmur. 

Kikboksinq Federasiyasından “Milli.az” saytına deyilib ki, Federasiya Musayevə olan sui-qəsd cəhdini pisləyir və hadisə ilə bağlı saxlanılan şəxsləri tanımır.