“Xəbərman” saytının həbsdə olan rəhbəri Polad Aslanovun həyat yoldaşı Gülmirə Aslanova jurnalistin müayinə cavablarının qəsdən gecikdirildiyini bildirir. 

Avqustun 21-də “Facebook” səhifəsində xəbər verən Aslanova deyir ki, həyat yoldaşı iyulun 18-də saxlanıldığı 15 saylı Cəzaçəkmə Müəssisəsində ultrasəs müayinəsindən keçsə də, cavablarını hələ də ailəyə vermirlər. 

“Cəzaçəkmə müəssisəsində onu müayinə edən Müalicə Müəssisəsinin həkim əməkdaşı şifahi şəkildə Polad Aslanova qaraciyərində problemin olduğunu söyləyib.

Polad Aslanov dəfələrlə 15saylı Cəzaçəkmə Müəssisəsinin həkimindən  müayinə cavablarını tələb etsə də vermirlər”, - o qeyd edib. 

Həyat yoldaşı jurnalistin müayinə nəticələrinin verilməməsinin qəsdən edildiyini düşünür. 

“Məqsədli şəkildə Polad Aslanovun müayinə cavabını gecikdirməklə qaraciyərində bizə məlum olmayan problemin daha da dərinləşməsini gözləyirlər.

Vicdansızlar, insafsızlar, Polad Aslanovun sağlamlığı ilə oynayırlar”, - o əlavə edib. 

Aslanova, həmçinin, jurnalistin tibbi yardımdan narazı olması ilə bağlı Ombudsmana etdiyi şikayətin iyunun 30-da Ədliyyə Nazirliyi Tibb Baş İdarəsinə göndərildiyini açıqlayıb. 

İyulun 31-də Ombudsman Aparatından Aslanova göndərilən məktubda görünür ki, Tibb Baş İdarəsi jurnalistin 2020-ci ildə Bakı İstintaq Təcridxanasına qəbul olunarkən müayinələrdən keçirildiyini və "praktiki sağlam" kimi qeydiyyata götürüldüyünü bildirib. 

Aslanova Tibb Baş İdarəsinin rəisi Cəmil Kamilliyə müraciət edərək həmin tarixdən 5 il keçdiyini xatırladıb, lakin hazırki tələblərinin yalnız ultrasəs müayinəsi cavabları olduğunu deyib. 

Polad Aslanov 12 iyun 2019-cu ildə casusluq ittihamı ilə 16 il azadlıqdan məhrum edillib, daha sonra Ali Məhkəmənin qərarı ilə cəzası 13 ilə qədər azaldılıb.

Aslanov ittihamları rədd edir, hökumətdə korrupsiya faktlarını ifşa etdiyinə görə təqib edildiyini bildirir.

Hüquq müdafiəçiləri onu siyasi məhbus kimi tanıyıblar. 

Avropa İnsan Hüquqları Məhkəməsi onun həbsinin qanunsuz olduğunu təsdiq edib və təzminat təyin edib. Azərbaycan hökuməti də təzminatı ödəyib.