“Abzas Media”nın həbsdə olan baş redaktoru Sevinc Vaqifqızı Bakı İstintaq Təcridxanası rəhbərliyinin ailəsinin gətirdiyi sərinkeşi buraxmadığını bildirib. 

“Abzas Media”nın xəbərinə görə, jurnalist bunu ailə üzvlərinə deyib. 

Məlumatda deyilir ki, təcridxana rəisinin müavini Əhəd Abdıyev jurnalistin sərinkeşə niyə icazə verilmədiyi barədə sualına “ürəyimiz belə istəyir” deyə cavab verib. 

“Keçən il ürəyimiz istədi, sərinkeşi içəri buraxdıq, bu il isə ürəyimiz belə istəyir, icazə vermirik”, - deyə onun cavab verdiyi bildirilir. 

Həmçinin, Abdıyevin Vaqifqızının kamerasına gələrək sərinkeşin içəri buraxılmamasının "prinsip məsələsi” olduğunu deməsi qeyd olunur. 
 
“Dedim ki, nəyin prinsipini edirsiniz? Rəis dustaqla niyə prinsip aparmalıdır?”, - Vaqifqızı sual edib. 
 
Jurnalistin sözlərinə görə, Abdıyev ona təcridxana hesabına sərinkeş verə biləcəklərini deyib. Vaqifqızı isə onlardan “heç bir şey istəmədiyini, ailəsinin ona gətirdiyi sərinkeşin içəri buraxılmasını” tələb edib. Jurnalist əlavə edib ki, sərinkeş qadağan olunmuş əşyaların siyahısında deyil və içəri ötürülməsinə icazə verilməlidir.
 
“Mənim ailəmin aldığı sərinkeşi içəri keçirmək haqqım var. Necə olur ki, bir ay yarımda 3 dəfə o sərinkeşi gətizdirirəm, ailəmi çöldə günün altında gözlədirsiniz, axırda da sərinkeşi içəri buraxmırsınız? Sizin buna ixtiyarınız yoxdur”, - Vaqifqızı Abdıyevə bildirib. 
 
“Mən əgər haqqımı kiməsə güzəştə getsəydim, bu saat həbsdə olmazdım. Sizdən də heç bir sərinkeş götürməyəcəyəm. Burada 153 qadın məhbus var. Bu yay hələ heç birinə bir dənə də sərinkeş verilməyib. Necə olur ki, rəis gəlib ancaq mənə sərinkeş vermək istəyir? Mənə lazım deyil bu. Bütün kameralara od yağır, hamı istidən bişir. Heç kimə müəssisə hesabına sərinkeş verilmir, bircə mənə veriləcək? Bu, dövlət büdcəsidir, sizin şəxsi büdcəniz deyil. Sərinkeş verilməlidirsə, hamıya verilməlidir, tək mənə yox. Nə vaxt ki, buradakı 153 qadının hamısına sərinkeş veriləcək, o zaman mən də götürərəm”, - deyə o əlavə edib. 

İyunun 20-də Bakı Ağır Cinayətlər Məhkəməsində baş tutan iclasda “Abzas Media işi” üzrə təqsirləndirilən şəxslərə hökm oxunub. 

Hakimin qərarı ilə “Abzas Media”nın direktoru Ülvi Həsənli, baş redaktor Sevinc Vaqifqızı, araşdırmaçı jurnalist Hafiz Babalı və “Azadlıq Radiosu"nun jurnalisti, iqtisadçı Fərid Mehralızadə 9 il, jurnalistlər Nərgiz Absalamova və Elnarə Qasımova 8 il, “Abzas Media"nın koordinatoru Məhəmməd Kekalov isə 7 il 6 ay azadlıqdan məhrum edilib.

Onlar ilkin olaraq qaçaqmalçılıq olmaqla bir sıra maddələrlə ittiham olunublar. 

Həbs olunan şəxslər ittihamları qəbul etmir, peşə fəaliyyətlərinə görə həbs olunduqlarını deyirlər.