Yanvarın 8-də Zaqatala Rayon Mərkəzi Xəstəxanasında qızdırma ilə xəstəxanaya gətirilən iki yaşlı Maxac İsmayıl oğlu Katmayev ölüb.

Bu, həmin xəstəxanada il başlayandan bəri artıq ikinci uşaq ölümüdür. Yanvarın 7-də isə yeni doğulmuş körpənin öldüyü bildirilmişdi.

Qafqazinfo-nun məlumatına görə, yanvarın 8-də Zaqatala rayon Mərkəzi Xəstəxanasının Təcili Yardım şöbəsinə gətirilən  Danaçı kənd sakini Maxac Katmayevi müayinə edən həkimlər onda qızdırma, virus infeksiyası və pnevmoniya əlamətləri olduğunu müəyyən ediblər. Uşağın təcili Reanimasiya şöbəsinə köçürüldüyü, amma müdaxilələrə baxmayaraq, axşam saat 19 radələrində öldüyü qeyd olunur.

Yanvarın 7-də isə sözügedən xəstəxanada yeni dünyaya gəlmiş körpənin ölümü ilə bağlı TƏBİB-dən Report-a bildirilib ki, Zaqatala rayonunun Gözbarax kənd sakini, 1992-ci il təvəllüdlü şəxs 38 həftəlik hamiləlik diaqnozu ilə Zaqatala Rayon Mərkəzi Xəstəxanasına planlı qeysəriyyə əməliyyatı üçün müraciət edib:

"Saat 15:30-da əməliyyat icra edilib, yaşama qabiliyyətinə mane olan çoxsaylı qüsurlar və anomaliyalarla, çəkisi 2800 qram, cinsi qız olan diri körpə (ağır vəziyyətdə) dünyaya gəlib. İki saat sonra göstərilən bütün tibbi müdaxilələrə baxmayaraq, körpədə ölüm faktı qeydə alınıb".

Ötən ilin noyabrında da məhz bu xəstəxanada bir həftə içində iki yeni dünyaya gələn körpə tələf olmuşdu. 

Bunlar ictimaiyyətə bəlli olan faktlardı.

2024-cü ilin noyabrında həmin xəstəxanada təkcə noyabrda dörd körpənin ölümünə diqqət çəkən vəkil Zibeydə Sadıqova Facebook profilində komissiya təşkil edilməsini və problemlərin aşkar edilməsini tələb edir.

Hələlik rəsmi qurumlar buna münasibət bildirməyiblər.

Təkcə son illər mətbuatda gedən xəbərləri izlədikdə Zaqatala rayon Mərkəzi Xəstəxanasında ana və uşaq ölümləri ilə bağlı çox sayda şikayətlər gəldiyini görmək olar. Elə iki fakt haqda iki il öncə Toplum TV əməkdaşları da bununla bağlı reportaj hazırlamışdılar: “Zaqatalada ana və uşaq ölümünün səbəbi: “Dedilər ki, onun adamı var. Bəs mən adam deyiləm, uşağımı öldürürsünüz?”.

O zaman TƏBİB-dən Toplum TV-yə həmin xəstəxananın nəzarət altında olduğu deyilmişdi. Amma üstündən iki il keçir və Zaqatala Rayon Mərkəzi Xəstəxanasından ana və uşaq ölümləri xəbərləri gəlməkdə davam edir. Bu xəstəxanada nə baş verir? Buna ancaq rəsmi qurumlar izahat verə bilər. 

Bir qədər öncə isə Toplum TV “Ötən il ana ölümündə rekord göstərici, uşaq ölümündə 90-cı illərə qayıdış"

başlıqlı yazıda ana və uşaq ölümlərinin ölkədə kəskin artmasından yazmışdı. Qeyd edilirdi ki, rəsmi statistikaya görə, 2023-cü ildə hər 1000 nəfər doğulan uşaqdan 1 yaşına çatmadan 18 uşaq tələf olub. Bu əvvəlki 3 il (2020-2022-ci illər) üzrə orta göstəricidən az qala 2,5 dəfə yüksəkdir. Həmin göstərici 2020-ci ildə 9,8 nəfər, 2021-ci ildə 7,5 nəfər, 2022-ci ildə isə 7,8 nəfər olub. 

Bundan başqa, 1996-1997-ci illərin rəqəmlərinin təkrarlandığı vurğulanırdı: Azərbaycanda 2023-cü ildə qeydə alınan 1 yaşa qədər uşaq ölümü əmsalı az qala 1990-cı illərin sonlarındakı səviyyəyə uyğundur. 1996-1997-ci ildə bu göstəricinin səviyyəsi 19 nəfərə yaxın olub, sonrakı dövrdə davamlı olaraq azalaraq 2006-2022-ci illərdə 7,8-12 nəfər intervalında dəyişib.