Bu gün, iyunun 23-də Milli Məclisdin plenar iclasında Gədəbəy rayonunun Söyüdlü kəndindəki etiraz aksiyası müzakirə olunub. 

Toplum TV xəbər verir ki, deputatlar birmənalı şəkildə etiraz aksiyasının arxasında xarici qüvvələrin olduğunu ehtimal ediblər. 

"Rusiya izi"

Elmad Nəsirov hadisələrin arxasında "Rusiya izi"nin ola biləcəyinə diqqət çəkib.

“Heç nə birdən birə olmur. İki həftə əvvəl Rusiyada yaşayan 2 nəfər gəlib bu hadisələr üçün pul toplayıb. Başqa adamların, Gədəbəy rayon İcra Hakimiyyətinin keçmiş başçısı Saleh Rüstəmlinin və keçmiş millət vəkili Nazim Bəydəmirlinin də adı çəkilir. Bir çoxu da mahiyyətə varmadan bu prosesə qoşulur. Azərbaycan polisi öz vəzifəsini icra edib. Bu zaman bir nəfər polis qaydanı pozub, o da cəzalandırılacaq. DİN bununla bağlı yoxlama təşkil edib və əməkdaşlarını Söyüdlüyə göndərib. Dövlət bütün imkanlarından istifadə edir ki, bu hadisənin əsas mahiyyəti önə çıxsın”, - deyə o qeyd edib.

"Ucqar kənddə bu hadisənin yaranmasının arxasında təbii ki, kimlərsə dayanır"

Gədəbəydən seçilmiş deputat Sevinc Hüseynova bildirib ki, hadisənin baş verməsi təsadüfi deyil. 

“Necə ola bilər ki, bu hadisə Laçın-Xankəndi yolunda ekofəallarımız nəticələr əldə edəndən, sülh müqaviləsi ilə bağlı irəli addımlar atılan zaman baş verib? Bu da müəyyən suallar doğurur. Ucqar kənddə bu hadisənin yaranmasının arxasında təbii ki, kimlərsə dayanır. Bu qüvvələrin niyyətləri gözlərində qaldı. Hadisənin qarşısı aidiyyəti qurumlar tərəfindən dərhal alındı və reaksiya verildi. Birmənalı olaraq əminəm ki, Söyüdlüdə iş aparan hüquq mühafizə orqanları, həm də Komissiya bu problemi həll edəcəklər. Sakinlərimizin ekoloji çirklənmə ilə bağlı müraciətləri vaxtında həll olunacaq. Düşünürəm ki, bu hadisəni törədənlər öz layiqli cəzasını alacaq”, - "Report" agentliyi deputatdan sitat gətirib. 

"Sadə xalqdan istifadə edildi"

Gədəbəydən seçilən digər deputat Arzu Nağıyev isə deyib ki, "bu məsələdə sadə xalqdan istifadə edildi".

O bildirib ki, problemi bu qədər böyütmək lazım deyildi: “Biz bu məsələdə sadə xalqdan istifadə edildi deyə bilərik. Ölkə xaricində yaşayanlar və daxilində olan koordinatları bu hadisədən öz məqsədləri üçün istifadə etdilər. Jurnalistlərin və digər şəxslərin işləri araşdırılmalıdır. Bu gün Gədəbəydə baş verən hadisələrin fonunda dövlətə qarşı böyük aksiyanın qarşısı alınıb və heç bir təhlükə yoxdur”.

"Dövlətimizin Şərqi Zəngəzurda apardığı işin üstünə kölgə salırlar”

Deputat Fazil Mustafa isə sosial mediada gedən müzakirələri tənqid edib: 

“Sosial şəbəkədə Gədəbəydə süni göldə süni balıq tutmağa çalışırlar. Onlar bununla dövlətimizin Şərqi Zəngəzurda apardığı işin üstünə kölgə salırlar”.

Deputat bildirib ki, bir polisin köntöy hərəkəti bütün polislərə aid edilməməlidir, bəziləri odun üstünə daha çox benzin tökmək yarışına giriblər.

Xatırlatma

İyunun 20-də Gədəbəy rayonunun Söyüdlü kəndinin sakinləri torpaq sahələrinin iri məmurlar tərəfindən zəbt edildiyini və bölgədə zəhərli süni gölün yaradıldığını iddia edərək etiraz aksiyası keçiriblər. 

Kənd sakini Sürəyya Əliyeva "Amerikanın Səsi"nə deyib ki, qızıl mədəninin turşu tərkibli sularının örüş torpaqlarında qurulmuş gölməçəyə axıdılmasının ekologiyanı pozması, sakinlər arasında xəstəliklərin yaranmasına səbəb olması ilə bağlı rəsmi qurumlara dəfələrlə şikayətlər edilib, amma şikayətlərə baxılmayıb. 

Etiraz aksiyasının dağıdılması zamanı 10-a yaxın yerli sakinin xəsarət aldığı bildirilir, 5 nəfər barəsində 20 sutkalıq həbs qərarı çıxarılıb. 

Baş nazir Əli Əsədovun Sərəncamı ilə bölgədə tullantıxana sahəsində monitorinqlərin aparılması və mövcud vəziyyətin qiymətləndirilməsi məqsədilə Komissiya yaradılıb.

Həmçinin Gədəbəy Rayon İcra Hakimiyyətinin başçısı Orxan Mürsəlov etirazçılarla görüşüb, ikinci süni gölün yaradılmayacağını bəyan edib.