Avqustun 19-da Bakı Apellyasiya Məhkəməsində həbsdə olan iqtisadçı Fazil Qasımovun şikayəti üzrə növbəti məhkəmə iclası keçirilib. 

Bu barədə onun ailə üzvləri Toplum TV-yə məlumat veriblər.

Ailə üzvləri bildirib ki, F.Qasımov apellyasiya şikayətinə yeni əlavələrini məhkəməyə təqdim edib. Əlavə olaraq, o, beş vəsatət verib.  

Birinci vəsatət Bəxtiyar Quluzadənin məhkəməyə şahid qismində çağırılıb dindirilməsi ilə bağlı olub. 

İqtisadçı vəsatəti əsaslandırmaq üçün bildirib ki, cinayət işində onun digər iqtisadçı Qubad İbadoğlu ilə görüşüb ona saxta pul verdiyi iddia olunur. F.Qasımov həmin vaxt B.Quluzadəni Türkiyədə tədbirə dəvət etdiyini, onu hava limanında qarşıladığını, onun yanında polis yoxlanışından keçdiyini, üzərində heç bir saxta pul olmadığını bildirib. Buna görə də, o, həmin vaxt yanında olan B.Quluzadənin buna şahid olduğunu deyib. 

F.Qasımovun ikinci vəsatəti bəzi sənədlərin sübutların siyahısından çıxarılması, üçüncü vəsatəti isə cinayət işinin materialları ilə tanış olması tələbilə olub. O, həmçinin, həbs qətimkan tədbirinin ev dustaqlığı ilə əvəz olunması barədə vəsatət verib. 

Prokuror vəsatətlərin heç birinin təmin edilməməsini istəyib. Hakim vəsatətləri təmin etməyib. 

Ardınca F.Qasımov məhkəmə tərkibinə yazılı etiraz etmək və vəkili Nemət Kərimli ilə konfidensial görüşmək üçün vaxt istəyib. 

Fasilədə vəkil cinayət işinin materiallarından surətlərini çıxardığı sənədləri F.Qasımova vermək istəyib, lakin konvoy buna icazə verməyib. 

Vəkil həmin sənədləri müvəkkilinə vermək üçün hakimdən icazə istəyib, lakin hakim bunun onun səlahiyyətində olmadığını deyib. 

F.Qasımov hakimlərin qərəzli olduğunu, əsaslı vəsatətlərinin heç birinin təmin edilməyini deyərək məhkəmə tərkibinə yazılı etiraz təqdim edib. Hakim etirazı təmin etməyib. 

Bundan sonra F.Qasımov vəkilindən imtina etməsi barədə vəsatət verib. O, dövlət hesabına vəkillə təmin edilməsini istəyib. Vəkil N.Kərimli də qanuna əsasən hakimin ərizəni mütləq qəbul etməli olduğunu deyib. 

Lakin hakim bu vəsatəti də təmin etməyib və bildirib ki, təqsirləndirilən şəxsin müdafiə hüquqları baxımından ərizənin qəbul edilməsi yolverilməzdir. Vəkil N.Kərimli buna etirazını bildirib və növbəti məhkəmə iclasında iştirak etməyəcəyini deyib. O, daha sonra məhkəmə zalını tərk edib.

Hakim növbəti məhkəmə iclasını 25 avqust saat 14:30-a təyin edib. 

Qubad İbadoğlunun işi ilə bağlı 2023-cü ildə Türkiyədə saxlanılaraq Azərbaycana gətirilən Fazil Qasımov bu il martında 9 il müddətinə azadlıqdan məhrum edilib. 

O, Cinayət Məcəlləsinin satış məqsədilə hazırlama, o cümlədən saxta pul və ya xarici valyuta əldə etmə və ya satma - eyni əməllər mütəşəkkil dəstə tərəfindən törədildikdə maddəsilə ittiham olundu. Özü isə ittihamı rədd edir. 

Qubad İbadoğlu 2023-cü ilin iyulunda həbs olunub, satış məqsədi ilə hazırlama, o cümlədən saxta pul və ya xarici valyuta əldə etmə və ya satma və dini ekstremist materialları hazırlama, saxlama və ya yayma maddələri ilə ittiham olunur. O, ittihamları rədd edir. 

Ötən ilin aprelində Qubad İbadoğlu ev dustaqlığına buraxılıb, mayda isə bu qətimkan tədbiri də dəyişdirilib və o, polis nəzarətinə verilib.