Bakıda musiqi məktəblərində müəllimlərin ixtisara salınması xeyli sayda müəllim və valideynin narazılığına səbəb olub. 

Bu barədə övladlarını musiqi məktəblərinə göndərən valideynlər “Toplum TV”-yə danışıb. 

Bir çox müəllim və valideyn sosial şəbəkələrdə bu halla bağlı iradlarını paylaşıb. 

Qızı Əminəni 6 ildir pianino təhsili almağa göndərən Gülnarə (adlar şərtidir - red.) deyir ki, musiqi məktəblərində attestasiyalar keçirilir və keçməyən müəllimlər işdən çıxarılır. 

Gülnarə qeyd edir ki, əslində müəllim “qıtlığı yox, bolluğu” var, lakin attestasiyanın birdən-birə və tədris ilinin ortasında aparılması ajiotaj yaradıb. 

“Qızımın ixtisara salınan müəllimlərindən biri çox yaxşı müəllim idi. Amma attestasiya gələndə şifahi yoxlamada özünü itirib, yaxşı cavab verməyib. Problem isə ondadır ki, kəsilən müəllimlərə yenidən attestasiyadan keçmək şansı verilmir. Onlar işə qəbul olmaq üçün bir də imtahan verməlidirlər”, o deyib. 

Bununla belə, valideyn məktəblərdə müəllim çatışmazlığının olmadığını bildirib:

“Yəni, bizim uşağın məktəbində görməmişəm. İmtahanla yeni müəllimlər də işə götürülüb. Təhsilin səviyyəsi normaldır. Sovet dövründən qalan sistem hələ ki, tam çökməyib. Amma yeni sistem yaratmağa cəhd etdikləri görünür, necə olacaq bilmirik.”

Musiqi müəllimlərinin attestasiyasını Mədəniyyət Nazirliyi həyata keçirir. 

Qiymətləndirmədən kəsilən müəllimlər müqayisə üçün, Təhsil Nazirliyinin fənn müəllimləri üçün apardığı qiymətləndirmələrdən kəsilənlərə ikinci şansın verildiyini deyirlər və özləri də belə imkan istəyirlər. 

“Təhsil nazirliyinin apardığı qiymətləndirmədə müəyyən bal şkalası qoyulur. Aşağı bal toplayan müəllimin dərs sayı azaldılır, növbəti il də aşağı bal toplasa işdən çıxarılır. Bu da müəllimlər arasında güclü effekt verir, onlar yaxşı hazırlaşırlar və uşaqlarla da həvəslə işləyirlər. Mədəniyyət Nazirliyi isə müəllimlərə hazırlaşmağa aman verməyib və kəsilənləri işdən çıxarır”, Gülnarə deyir. 

Daha öncə Mədəniyyət nazirinin müşaviri Cəsarət Valehov İctimai televiziyaya müsahibəsində bildirmişdi ki, attestasiyanın məqsədi müəllimlərin bilik və bacarıqlarını yoxlamaqdır və heç kim işdən çıxarılmayacaq. 

Bu il aprelin 3-də 50-dən çox musiqi müəllimi Mədəniyyət Nazirliyinin önünə toplaşıb və Cəsarət Valehovla görüş tələb edib. Onlar deyiblər ki, nazir müşaviri müəllimləri aldadıb. 

“Sitat.info” saytının yaydığı məlumatda bildirilir ki, bir müəllim özünə xəsarət yetirmək istəyərkən polis tərəfindən xilas edilib, bir neçə müəllimin isə ürəyi gedib. 

“Facebook” sosial şəbəkəsindəki müəllimlər qruplarında məsələ ilə bağlı rəylər birmənalı deyil. Bir qrup müəllim şikayətlənsə də, valideynlərin bir qismi müəllimlərin savadsız olduğunu irəli sürüb. 

“Əvvəlcə müəllimə işləmək üçün yararlı bina və içinin avadanlığını verin. Müəllimlər jurnal və fərdi vərəqə əvəzinə adi dəftərdən istifadə edirsə hansı ədalətdən danışırsınız? Müəllimi ehtiyacı olan avadanlıqlarla təmin edin, sonra onları imtahan edin. 2 il bundan əvvəl məktəbi bitirənlər şəhadətnamələrini ala bilmirlər”, bir müəllim şərhində qeyd edib. 

Fortepiano müəllimlərini qiymətləndirən komissiyaya sədrlik etmiş Nəzakət Rimazi “Qafqazinfo” saytına bildirib ki, attestasiya zamanı “zəif cavab verən” müəllimlər üstünlük təşkil edib:

“Məsələn, bir müəllimə hansı bəstəkarın əsərini ifa edirdisə, adətən o bəstəkarın yaradıcılığı ilə bağlı suallar ünvanlayırdıq və mövzudan kənara çıxmırdıq. Üzdən oxuma zamanı isə biz əsərin aid olduğu tonallığın hansı işarələrə malik olduğunu soruşurduq. Normalda bunu 1-ci və 2-ci sinif şagirdləri bilməlidir. Təəssüf ki, bəzi müəllimlər bu sualları belə cavablandıra bilmirdilər və bu, bizi çox təəccübləndirirdi.”

“Toplum TV”ə danışan Kamil adlı valideyn (ad şərtidir - red.) deyir ki, ötən tədris ilində oğlunun təhsil aldığı məktəbdə müəllim dünyasını dəyişəndən sonra şagirdlər iki ay müəllimsiz qalıblar. 

“Təhsil nazirliyinə müraciət etdik ki, müəllim göndərsinlər. Nazirlik dedi ki, müəllim ayrılacaq, amma gözləməlisiniz. 2 aya yaxın yeni müəllim təyin edilməsini gözlədik. Sonra cavan bir müəllim gəldi, bizə dedilər nazirlikdə imtahan verib və göndərilib. Çox razıyıq, oğlum da onu çox sevir,” deyən valideyn dərsin keyfiyyətindən razılıq ifadə edib.

Aprelin 2-də Mədəniyyət Nazirliyi açıqlama yayaraq bildirib ki, fevral-mart aylarında 1675 musiqi müəllimi attestasiyaya cəlb olunub və onların 1183 nəfəri qiymətləndirmədən uğurla keçib. 

“Attestasiya zamanı müəllimlərin aidiyyəti üzrə təlimlərə və ixtisasartırmaya ehtiyacları müəyyən edilib ki, bu da sonrakı prosesdə Ü.Hacıbəyli adına Bakı Musiqi Akademiyası, Azərbaycan Milli Konservatoriyası və Azərbaycan Dövlət Mədəniyyət və İncəsənət Universiteti ilə birlikdə sistemli təlim prosesinin təşkili üçün çox vacib resursdur.”

492 müəllim isə attestasiya komissiyalarının qiymətləndirməsinə əsasən, “tutduğu vəzifəyə uyğun hesab edilməyib”. 

Nazirlik əlavə edib ki, 492 nəfərdən 112-si attestasiya komissiyalarından 2 lehinə, 3 əleyhinə səs almaqla qiymətləndirmədən kəsiliblər. Lakin onlara “təlimlərə cəlb olunmaq və müəyyən müddətdən sonra təşkil olunacaq imtahanın nəticələrinə əsasən əvvəlki iş yerlərinə qəbul edilmək imkanı” veriləcək.

Qiymətləndirmədən kəsilən digər müəllimlər isə yenidən işə qəbul imtahanı verməli olacaq.