Ermənistan hakimiyyəti keçmiş prezident Serj Sarkisyan, habelə parlamentin iki müxalif üzvünü ayrı-ayrılıqda mühakimə etməyə hazırlaşır. 

Martın 12-də ölkənin baş prokuroru parlamentə müraciət edib ki, iki deputatın toxunulmazlıq hüquqları götürülsün.

Məqsəd onlara qarşı cinayət işi üzrə ittiham irəli sürməkdir. 

Baş prokuror bildirib ki, müstəntiqlər deputatlardan biri, vaxtilə Baş nazir Nikol Paşinyanın partiyasından olan Hovik Ağazaryanı rüşvət və vəzifədən sui-istifadədə ittiham etmək istəyirlər.

Digər deputat, keçmiş Yerevan meri Taron Markaryan isə çirkli pulların yuyulması, vəzifədən sui-istifadə və bələdiyyə torpağının qanunsuz özəlləşdiriməsində təqsirləndiriləcək. 

Ötən ilin noyabrında Paşinyan aralarında Ağazaryanın da olduğu yeddi rəsmidən, konkret səbəblər göstərmədən postlarından istefa verməsini tələb edib.

Onlardan təkcə Ağazaryan baş nazirin tələbinə əməl etməyib və nəticədə partiya sıralarından qovulub.

Ağazaryan daha sonra öz partiyasının əsasını qoyub. 

Vaxtilə Paşinyanı hakimiyyətə gətirən 2018-ci ilin “Bənövşəyi inqilab”ının əsas

fiqurlarından olan Ağazaryan prokurorluğun ittihamlarını rədd edir.

Markaryan isə keçmiş prezident Serj Sarkisyanın başçılıq etdiyi Respublika Partiyasının üzvüdür. Onun özü ittihamlara hələ cavab verməyib.

Partiya isə bunu “siyasi repressiya” və qarşıdan gələn parlament seçkilərindən diqqəti yayındırmaq cəhdi adlandırır. 

Parlament baş prokurorun istəyi üzrə müraciətə martın 25-dəki iclasında baxacaq. 

Martın 12-i Sarkisyanın özünün də cinayət işi üzrə yenidən ittiham olunduğu məlum olub. 

Azadlıq Radiosunun erməni xidməti baş prokurorluğa istinadən məlumat verib ki, yanvar ayında keçmiş prezidentə qarşı çirkli pulların yuyulması və külli miqdarda mənimsəmə maddələrilə ittihamlar irəli sürüb. 

Bu iddialara görə, Sarkisyan 2005-ci ildə, müdafiə naziri ikən Yerevanın Yerablur

hərbi qəbiristanlığında dövlətə məxsus torpaqları özəlləşdirərək satıb.

Onun vəkili bu iddiaları yalan adlandırır.