ABŞ prezidenti Donald Tramp Kanada ilə davam edən ticarət gərginliyi fonunda ABŞ-Kanada sərhədində yerləşən Ontario gölünün “Amerika gölü” adlandırılmasını nəzərdə tutan fərman imzalayıb.

Fərmana əsasən, ABŞ-nin federal qurumları bundan sonra gölə istinad edərkən yeni addan istifadə etməlidir. ABŞ Geoloji Xidmətinin rəhbərliyi “Amerika gölü” adının ölkə daxilində rəsmi xəritələrdə də işlədiləcəyini bildirib.
ABŞ-nin daxili işlər naziri Daq Berqam qərarı şərh edərkən ölkə ərazisində yerləşən və ya onunla həmsərhəd olan coğrafi obyektlərin adlarının “Amerikanın əzəmətini əks etdirməli olduğunu” deyib.

Kanada hakimiyyəti isə Trampın qərarını qəbul etməyib və gölü bundan sonra da “Ontario gölü” adlandıracağını açıqlayıb.

Kanadanın Baş naziri Mark Karni bildirib ki, “Ontario” sözü bölgənin yerli xalqlarından olan vendatların (huronların) dilindən gəlir və “böyük, gözəl göl” mənasını verir.

ABŞ prezidentinin fərmanı gölün beynəlxalq səviyyədə tanınan adını dəyişmir. Qərar ABŞ federal qurumlarının istifadə etdiyi rəsmi terminologiyaya aiddir və Kanada üçün hüquqi qüvvəyə malik deyil.

Ontario gölü ABŞ və Kanada arasında yerləşən beş Böyük göldən biridir. O, Böyük göllər sisteminin ən şərqində yerləşir və sahəsinə görə onların ən kiçiyidir.

Bu, Trampın prezident fərmanı ilə coğrafi obyektin adının dəyişdirilməsi təşəbbüsü ilə ilk çıxışı deyil. O, daha əvvəl Meksika körfəzinin ABŞ-yə aid hissəsinin “Amerika körfəzi” adlandırılması barədə göstəriş vermişdi.

Ontario gölü ilə bağlı qərar ABŞ və Kanada arasında ticarət münasibətlərinin kəskinləşdiyi vaxta təsadüf edir.

Kanada avqustun 25-də ABŞ-dən idxal olunan bir sıra mallara 15 faizdən 50 faizədək cavab rüsumlarının tətbiq ediləcəyini açıqlayıb. Yeni tariflərin sentyabrın 8-dən qüvvəyə minməsi nəzərdə tutulur.

Kanadanın qərarı ABŞ-nin bu ölkədən idxal edilən bir sıra məhsullara 50 faizlik rüsum tətbiq etməsinə cavab olaraq verilib. Tərəflər ticarət razılaşması əldə edə bilməyib və danışıqların uğursuzluğunda bir-birini ittiham ediblər.