"Meydan TV işi" üzrə həbs olunan və Bakı İstintaq Təcridxanasında saxlanılan jurnalist Ülviyyə Əli (Quliyeva) təhlükəsizliyinin risk altında olduğunu bildirib.

Yaxınlarının avqustun 27-də jurnalistə istinadən yaydığı məlumata görə, avqustun 22-dən Ü.Əli adam öldürməkdə ittiham olunan qadınla eyni kamerada saxlanılır. Yaxınları həmin qadının cinayəti affekt vəziyyətində törətdiyini dediyini, təcridxanada isə psixiatrik və ya psixoloji müayinədən keçirilib-keçirilmədiyi barədə onlara məlumat verilmədiyini bildirir.

Ü.Əlinin anası məsələ ilə bağlı Ombudsman Aparatına müraciət etdiyini deyir. Onun sözlərinə görə, Penitensiar Xidmətlə də dəfələrlə əlaqə saxlamağa çalışsa da, zənglərinə cavab verilməyib.

Anası Ü.Əlinin başqa kameraya köçürülməsi üçün təcridxana rəhbərliyinə müraciət etdiyini, lakin rəhbər şəxslərin məzuniyyətdə olduğu əsas gətirilərək kameranın dəyişdirilmədiyini bildirir.

Ü.Əli isə ailəsi ilə telefon danışığı zamanı baş verənləri jurnalist fəaliyyəti və təcridxanadakı şəraitlə bağlı etirazları ilə əlaqələndirib.

“Mən bunu İqbal Əbilovla etdiyim müsahibəyə və Bakı İstintaq Təcridxanasında havalandırma sisteminin işləməməsi ilə bağlı etdiyim etiraza görə cəzalandırılmağımla əlaqələndirirəm. Ümumiyyətlə, həbsxanada yazdığım məqalələrə və etdiyim etirazlara görə qərəzli davranışlarla qarşılaşıram”, - o bildirib.

Ü.Əlinin sözlərinə görə, bir neçə ay əvvəl də onun kamerasına özünə xəsarət yetirən şəxs yerləşdirilib:
“Mənə psixoloji və mənəvi işgəncə yaşatmaq niyyəti güdürlər. Hazırda təhlükəsizliyim sual altındadır. Başıma gələcək hər şeyə görə hakimiyyət məsuliyyət daşıyır”.

Ü.Əlinin ailəsi onun təhlükəsizliyinin təmin edilməsini, mövcud risklərin qiymətləndirilməsini və təhlükəsiz şəraitdə saxlanılması üçün zəruri tədbirlərin görülməsini tələb edir.
Penitensiar Xidmət Ü.Quliyevanın ailəsinin səsləndirdiyi iddialara hələ münasibət bildirməyib.

Ülviyyə Əli barəsində Cinayət Məcəlləsinin 206.3.2 (Qaçaqmalçılıq, qabaqcadan əlbir olan bir qrup şəxs tərəfindən törədildikdə) maddəsi ilə ittiham irəli sürülüb.

O, jurnalist kimi “Amerikanın Səsi” ilə əməkdaşlıq edib. 

Bu media qurumu ilə əməkdaşlığını bitirəndən sonra da öz sosial media hesablarında siyasi motivli məhkəmələrdən reportajlar yayımlamağa davam edib. 

2024-cü il dekabrın 6-da “Meydan TV işi” üzrə saytın Azərbaycan nümayəndəliyinin rəhbəri Aynur Elgünəş, jurnalistlər Ramin Deko, Aynur Elgünəş, Aysel Umudova, Aytac Tapdıq, Xəyalə Ağayeva, Natiq Cavadlı, vətəndaş cəmiyyəti üzvü Ülvi Tahirov saxlanılıblar.

Sonrada “Arqument.az” saytının baş redaktoru, “Meydan TV” ilə əməkdaşlıq edən jurnalist Şəmşad Ağayev (Ağa), jurnalistlər Nurlan Libre (Qəhrəmanlı) və Fatimə Mövlamlı da “Meydan TV işi”nə görə həbs edilib.

Saxlanılan jurnalistlərin heç biri özünü təqsirli bilmir.