Rəsmi statistik hesabatlara görə, 2020-ci ildə işğaldan azad edilmiş ərazilərin bərpasına son 5 ildə (2025-ci ilin sonuna qədər) 23,4 milyard manat xərclənib. Həmin vəsaitlərdən ən böyük məbləğ - təxminən 3,9 milyard manat Kəlbəcər rayonu ərazisindəkə tikinti-bərpa işlərinə sərf edilib.    

Kəlbəcərdən sonra ən çox investisiyanın yönəldildiyi inzibati ərazilər isə Laçın rayonu (3,3 milyard manatdan bir qədər çox), Zəngilan, Füzuli və Ağdam rayonları (hər biri üzrə təxminən 2,8 milyard manat), Şuşa şəhəri  (2,7 milyard manat), Cəbrayıl rayonu (2,3 milyard manatdan bir qədər çox) olub. Ötən müddətdə ən az investisiya yatırılan ərazi isə Ağdərə rayonu olub (129 milyon manat).

Bu ərazilər üzrə ümumi investisiyaların ən böyük hissəsi  - təxminən 70 faizi (16 milyard manata yaxın) ən müxtəlif infrastruktur layihələrinə, 5 faizindən çoxu (1,3 milyard manata yaxın) mənzil tikintisinə sərf edilib. Lakin bu xərcləmələrlə bağlı hesabatlılıq olmadığı üçün infrastruktur xərclərinin bölgüsü, yəni təhsil, səhiyyə, nəqliyyat və s. istiqamətlər üzrə xərclənən vəsaitlərin dəqiq məbləği barədə məlumat almaq mümkün deyil.

Lakin bir sıra mənbələrdə məbləğlər göstərilmədən həyata keçirilən layihələrin siyahısını toplamaq olur. İnternet mənbələrində yayılan xəbərlər əsasında aparılan araşdırma göstərir ki, Xocalı, Xocavənd və Ağdərə rayonlarına, eləcə də Xankəndi ətrafına mövcud olan 1200-ə yaxın mənzil təmir əsasında bərpa edilib və onlara köç baş tutub. Cəbrayıl, Zəngilan, Ağdam, Laçın, Kəlbəcər, Füzuli və Şuşa şəhərlərində, eləcə də onların 10-a yaxın kənidndə 10 min ətrafında mənzil tam istifadəyə verilib.

İşğaldan azad edilmiş ərazilərə yönəldilən investisiyalar çərçivəsində ötən illərdə həyata keçirilən bəzi layihələrə nəzər salmağa dəyər:

Xankəndi şəhərində: “Xankəndi” Biznes Mərkəzi, Konqres Mərkəzi, Qarabağ Universiteti üçün 3 fəqli bina və korpus, Zəfər parkı;

Ağdərə rayonunda: məscid;

Cəbrayıl rayonunda: “Şəfəq” Günəş Elektrik Stansiyasına gedən avtomobil yolu, “Xudafərin” və “Qız Qalası” hidroqovşaqları;

Füzuli rayonunda: Əhmədbəyli-FüzuliŞuşa yolu, hava limanı;

Xocalı rayonunda: “Xocalı” yarımstansiyası və Rəqəmsal İdarəetmə Mərkəzi, heyvandarlıq kompleksi, kərpic zavodu, ofis mebelləri və mebel aksesuarlarının istehsalı müəssisəsi, məscid;

Kəlbəcər rayonunda: 9 kiçik su elektrik stansiyası, “İstisu” mineral su zavodu;

Laçın rayonunda: tikiş fabriki, ayaqqabı fabriki, 4 su elektrik stansiyası, İstirahət Kompleksi, Rəqəmsal İdarəetmə Mərkəzi, Beynəlxalq Hava Limanı;

Şuşa şəhərində: Daşaltı kənd məscidi, Müalicə-Sağlamlıq Mərkəzi,  Bayraq Meydanı, Otel-Konqres Mərkəzi Kompleksi, Yaradıcılıq Mərkəzi, “Yasəmən” oteli, Yuxarı Gövhər Ağa məscidi, Milli Xalça Muzeyinin Şuşa filialı, Mehmandarovların malikanə kompleksi;

Zəngilan rayonunda: “Ağalı” hoteli, 3 su elektrik stansiyası, məscid,  Rəqəmsal İdarəetmə Mərkəzi, hava limanı, “Dost Aqropark”;

Ağdam rayonunda: Regional Rəqəmsal İdarəetmə Mərkəzi və Təlim-Tədris Kompleksi, Sənaye Parkı, Dəmir Yolu və Avtovağzal Kompleksi, Muğam Mərkəzi, “Hilton Garden Inn Agdam” hoteli, “Aghdam City Hotel”.