Prezident İlham Əliyev sentyabrın 10-da “Azərbaycanda qida təhlükəsizliyinin təmin edilməsinə dair 2027−2032-ci illər üçün Dövlət Proqramı”nı təsdiqləyib.

38 səhifəlik proqramda qeyd olunub ki, "ölkədə qida təhlükəsizliyi sahəsində mühüm nailiyyətlər əldə edilməsinə baxmayaraq, mövcud vəziyyətin təhlili bu sahədə bir sıra çatışmazlıqların olduğunu
göstərir."

"Belə ki, qida zəncirinin bütün mərhələləri üzrə (tarladan süfrəyədək) izlənilmə mexanizmlərinin tam formalaşmaması, heyvan və bitki sağlamlığına nəzarət sistemlərində bəzi çatışmazlıqlar qida təhlükəsizliyinin təmin edilməsinin əsas problemlərindəndir", - deyə əlavə olunub.

Proqramda əsas məqsədlər sırasında milli qida təhlükəsizliyi sisteminin gücləndirilməsi, qida mənşəli xəstəliklərin və təhlükələrin azaldılması və başqa məqsədlər göstərilib.

Kənd təsərrüfatı eksperti Vahid Məhərrəmli isə “Toplum TV”yə deyir ki, Azərbaycanda qida təhlükəsizliyi ilə bağlı ən böyük problem ölkənin vacib ərzaq məhsulları ilə özünü təmin edə bilməməsidir. Onun sözlərinə görə, ərzaq təhlükəsizliyinin təminatının bir neçə prinsipi var. 

“Birincisi ərzağın fiziki mövcudluğudur. Azərbaycan yeganə ölkələrdəndir ki, adambaşına illik ərzaq normasını müəyyən etməyib. Bu normanı müəyyən etmək hər il nə qədər ət, süd, buğda, meyvə-tərəvəz istehsal etməklə bağlı hədəfi ortaya qoymağa kömək edir. Qazaxıstanda hətta insanların yaş və cins qrupları üzrə, ayrı-ayrı qida məhsulları üçün norma müəyyənləşdirilib. Biz bu modeli hökumətə təklif etmişdik. Lakin Azərbaycanda hələ də bu norma, beləliklə ərzaq təhlükəsizliyinin birinci prinsipi yoxdur”, - o qeyd edib. 

Mütəxəssis bildirir ki, ərzaq təhlükəsizliyinin birinci prinsipi təmin olunmadığına görə, digər prinsiplər - ərzağın əlçatanlığı, keyfiyyətinin standartlara cavab verməsi, dayanıqlılığı və s. barədə danışmaq yersizdir. 

“Çünki özümüzü təmin edəcək səviyyədə ərzaq istehsal etməyəcəyiksə, deməli başqa ölkələrdən idxal edəcəyik. İdxaldan asılı olacağıqsa, dünyada qlobal istiləşmə kimi problemlər ucbatından ərzağın keyfiyyətinə daha önəm verilməyəcək. Beynəlxalq təşkilatlar artıq bununla bağlı həyəcan təbili çalırlar”, - o əlavə edib. 

V.Məhərrəmli ötən illərdə aqrar sahədə çoxsaylı dövlət proqramlarının qəbul edildiyini xatırladıb. O düşünür ki, bu proqramlar aqrar sahənin inkişafına və ərzaq təhlükəsizliyinin təminatına töhfə verməyib və yeni proqram da bu qəbildən olacaq. 

Bu ilin mayında kənd təsərrüfatındakı vəziyyətlə bağlı müşavirə keçirən prezident İlham Əliyev də, xüsusilə, buğda istehsalında özünütəminat səviyyəsinin aşağı olmasından gileylənmişdi. Rəsmi rəqəmə görə, Azərbaycanın buğda ilə özünü təminetmə səviyyəsi 55 faizdir.