Avropa İttifaqı jurnalistlərin öldürülməsi, təqib olunması, qanunsuz saxlanılması və peşə fəaliyyətinə görə təzyiqlərlə üzləşməsi ilə bağlı bəyanat yayıb.

Noyabrın 1-də Aİ-nin xarici siyasət və təhlükəsizlik üzrə ali nümayəndəsi Kaya Kallas, Avropa Komissiyasının icraçı vitse-prezidenti Henna Virkkunen və komissar Maykl Makqrat Beynəlxalq Jurnalistlərə Qarşı Cinayətlərə görə Cəzasızlığa Son Qoyulması Günü münasibətilə birgə bəyanat yayıblar.

Bəyanatda qeyd olunub ki, dünyanın müxtəlif yerlərində jurnalistlər öldürülür, işgəncəyə məruz qalır, təqib edilir, həbs olunur və ölkələrini tərk etməyə məcbur qalırlar.
“Jurnalistlər onlayn təqib, qanunsuz müşahidə, nüfuzdan salma kampaniyaları, məhkəmə iddialarından sui-istifadə və iqtisadi təzyiqlərlə üzləşirlər”, - bəyanatda bildirilib.

Aİ rəsmiləri qadın jurnalistlərin bu cür hücumlarla qeyri-mütənasib şəkildə daha çox üzləşdiyini vurğulayıblar. Onlar Aİ-nin müstəqil jurnalistikanı qorumağa davam edəcəyini bildiriblər.
“Avropa İttifaqı müstəqil jurnalistikanı qorumağa, jurnalistlərə dəstək verməyə və konkret halları tərəfdaş ölkələrlə insan hüquqları üzrə dialoqlarda qaldırmağa davam edəcək”, - birgə bəyanatda deyilir.

Bəyanata əsasən, Avropa Komissiyası 2025-ci ilin sonunadək 56 ölkədə müstəqil medianın dəstəklənməsi üçün 100-dən çox layihəyə başlayıb. 2015-ci ildən fəaliyyət göstərən ProtectDefenders.eu mexanizmi isə risk altında olan təxminən 13 min jurnalistə birbaşa yardım göstərib.

Aİ rəsmiləri bütün dövlətləri jurnalistləri qorumağa, onlara qarşı törədilən cinayətləri effektiv araşdırmağa və məsul şəxsləri ədalət mühakiməsi qarşısında cavab verməyə çağırıblar.

Aİ daha əvvəl də Azərbaycanda jurnalistlərin həbsi ilə bağlı bəyanatlar yayıb.

Avropa Jurnalistlər Federasiyasının 2025-ci ilin dekabrına olan məlumatına görə, Azərbaycanda 37 jurnalist və media işçisi həbsdə olub. Bu rəqəmə yalnız jurnalistlər deyil, media sahəsində çalışan digər şəxslər də daxildir.