Azərbaycan Xalq Cəbhəsi Partiyasının (AXCP) həbsdə olan üzvü, partiya sədri Əli Kərimlinin ictimai əsaslarla mühafizəçisi Kənan Zeynalovun ittiham olunduğu iş üzrə məhkəmə prosesi başlayıb. 

Bu barədə AXCP sədri Əli Kərimli oktyabrın 23-də "Facebook" səhifəsində xəbər verib. 

Ə.Kərimlinin yazdığına görə, Bakı Ağır Cinayətlər Məhkəməsində keçirilən iclasda K.Zeynalov həbs olunandan bəri, 7 aydır ailəsi ilə nə üzbəüz, nə də telefon zəngi ilə əlaqə qurmasına imkan verildiyini deyib. 

"O, bu 7 ayda tam təcrid vəziyyətində saxlanılıb. Rejim heç ağır cinayətlər törətmiş terrorçuları Kənan bəy qədər kommunikasiyasız saxlamır. 7 aydır ki, Kənan bəyə ailəsilə görüş, hətta telefonla danışıq imkanı belə verilmir. Kənan bəy məhkəmədə dedi ki, məhkəməyə 7 ay öncə həbs olunanda əynində olan paltarla gəlib. Çünki ona indiyə qədər də dəyişəcək paltar çatdırılmasına imkan verilməyib. Qərəz bu həddədir", - Ə.Kərimli qeyd edib. 

İttiham aktında iddia olunur ki, AXCP fəalı bu il martın 21-də Yeni Günəşli qəsəbəsində Anar Rəhimov adlı şəxsə mübahisə zəminində qarın nahiyəsindən bıçaqla zərbə endirib. 

"Kənan bəy qarışqanı belə tapdalamayacaq qədər mədəni, inanclı adamdır. Birinci Qarabağ savaşının qazisidir. Savaş zamanı ciddi xəsarət alıb. Belə bir dürüst və mədəni adamı, Qarabağ qazisini "uf" demədən şərləyiblər, üzünə durublar, həbs edəndən sonra da onunla  düşməncəsinə rəftar edirlər. Nəyə görə? Hardandır bu kin? Bu nəyin qisasıdır? Kənan bəyə ona görə acıqlıdırlar ki, əqidəsinə sadiqdir, mənim yanımdadır, bacardığı qədər məni rejimin müxtəlif təxribatlarından qorumağa çalışıb, hədə və şantajdan qorxmayıb", - Ə.Kərimli vurğulayıb. 

Prosesdə vəkil ittiham aktı ilə tanış olmadığı üçün məhkəmə iclası təxirə salınıb.

Hazırlıq iclası 6 noyabr tarixinə təyin edilib.

Kənan Zeynalov martın 22-də həbs olunub. O, Cinayət Məcəlləsinin 126.2.4-cü (xuliqanlıq niyyəti ilə qəsdən sağlamlığa ağır zərər vurma) maddəsi ilə təqsirləndirilir.

Əli Kərimlinin digər ictimai əsaslarla mühafizəçisi Niyaməddin Əhmədov da uzunmüddətli həbsdədir. Ona 2021-ci ildə terrorizm ittihamı ilə 13 il hökm oxunub. 

AXCP-nin 15-ə yaxın üzvü uzunmüddətli həbsdədir. Onlar ittihamları rədd edir, siyasi fəaliyyətlərinə görə həbs olunduqlarını deyirlər.