İyunun 17-də Bakı Apellyasiya Məhkəməsində iqtisadçı Fazil Qasımovın işi üzrə hakim Aqil Musayevin sədrliyi ilə məhkəmə prosesi keçirilib. 

Ailəsi Toplum TV-yə bildirib ki, Qasımov məhkəmə prosesində 27 gündür aclıq etdiyini və buna görə hələ də cərimə kamerasında (kars) saxlanıldığını deyib.

O, həmçinin, qeyd edib ki, apellyasiya şikayətinə yazdığı əlavə və dəyişikliklər Penitensiar Xidmətin əməkdaşları tərəfindən zorakılıqla əlindən alınıb. 

İqtisadçı ailə üzvlərindən Ombudsman Səbinə Əliyevanın ona baş çəkməsi üçün müraciət etmələrini istəyib. 

Qasımovun cinayət işinə xitam verilməsi ilə bağlı vəsatətini məhkəmə təmin etməyib.

Bundan başqa, məhkəmə müdafiə tərəfinin baxış iclasının istintaq aparılmaqla keçirilməsi, iqtisadçı Qubad İbadoğlunun çağırılıb dindirilməsi və Q.İbadoğlu ilə Anar Əliyevin iddia edilən görüşünün kamera görüntülərinin alınıb baxış keçirilməsi barədə vəsatətlərini də rədd edib. 

Daha sonra Qasımov dövlət ittihamçısı Emil Mirzəyevə də etiraz verib. O, etirazını prokurorun “qərəzli mövqeyi” ilə əsaslandırıb.  Bildirib ki, prokurorun heç bir əsas gətirmədən müdafiə tərəfinin bütün vəsatətlərinin rədd edilməsini istəməsi ona etiraz verilməsi üçün əsasdır. Prokuror etirazla bağlı deyib ki, bu, tam əsassız və məntiqsizdir və hakim Aqil Musayev etirazın baxılmamış saxlanılması haqqında qərar qəbul edib.

Qasımov aclıq aksiyası keçirdiyinə görə səhhətinin yaxşı olmadığını, həmçinin məhkəməyə təqdim edəcəyi şikayətə əlavə və dəyişikliklərin əlindən alındığını əsas gətirərək iclasın təxirə salınmasını istəyib. Məhkəmə yalnız bu vəsatəti təmin edib. 

Məhkəmə tərkibi 23 iyun tarixindən əmək məzuniyyətinə çıxdığı üçün məhkəmənin baxış iclası 29 iyul tarixinə saat 15:00-a təxirə salınıb.

Qubad İbadoğlunun işi ilə bağlı 2023-cü ildə Türkiyədə saxlanılaraq Azərbaycana gətirilən Fazil Qasımov bu il martında 9 il müddətinə azadlıqdan məhrum edilib. 

O, Cinayət Məcəlləsinin satış məqsədilə hazırlama, o cümlədən saxta pul və ya xarici valyuta əldə etmə və ya satma - eyni əməllər mütəşəkkil dəstə tərəfindən törədildikdə maddəsilə ittiham olundu. Özü isə ittihamı rədd edir. 

Qubad İbadoğlu 2023-cü ilin iyulunda həbs olunub, satış məqsədi ilə hazırlama, o cümlədən saxta pul və ya xarici valyuta əldə etmə və ya satma və dini ekstremist materialları hazırlama, saxlama və ya yayma maddələri ilə ittiham olunur. O, ittihamları rədd edir. 

Ötən ilin aprelində Qubad İbadoğlu ev dustaqlığına buraxılıb, mayda isə bu qətimkan tədbiri də dəyişdirilib və o, polis nəzarətinə verilib.