Gələn il Azərbaycanın dövlət büdcəsinə neft-qaz sektorundan daxilolmaların 955 milyon manat azalacağı gözlənilir. Hökumət qeyri-neft-qaz gəlirlərinin artması hesabına büdcənin ümumi gəlirlərində 1,6 faizlik artım proqnozlaşdırır.

Maliyyə Nazirliyinin açıqladığı ilkin göstəricilərə əsasən, 2027-ci ildə dövlət büdcəsinin gəlirləri 39 milyard 234 milyon manat, xərcləri isə 42 milyard 400 milyon manat olacaq. Bu, 2026-cı ilin təsdiqlənmiş büdcəsi ilə müqayisədə gəlirlərin 625 milyon, xərclərin isə 696,4 milyon manat artması deməkdir.

Neft-qaz sektorundan büdcəyə 15 milyard 480 milyon manat daxil olacağı nəzərdə tutulur. Bu məbləğ cari ilin proqnozundan 5,8 faiz azdır. Bununla belə, büdcə gəlirlərinin 39,5 faizi yenə neft-qaz sektorunun payına düşəcək.

Azalma əsasən Dövlət Neft Fondundan büdcəyə köçürmələrin 935 milyon manat azaldılması ilə bağlıdır. Gələn il fonddan 11 milyard 900 milyon manat transfert nəzərdə tutulur. Bu, büdcə gəlirlərinin təxminən 30 faizidir.

Büdcə hesablamalarında neftin bir barelinin qiyməti 2026-cı ildə olduğu kimi, 65 dollar götürülüb.
Qeyri-neft-qaz sektorundan isə 23 milyard 754 milyon manat gəlir gözlənilir. Hökumət bu mənbədən daxilolmaların 7,13 faiz artacağını proqnozlaşdırır.

Dövlət Vergi Xidmətinin xətti ilə büdcəyə 18 milyard 430 milyon manat daxil olması nəzərdə tutulur. Bu, cari ilin göstəricisindən 1 milyard 520 milyon manat və ya 9 faiz çoxdur.

Fiziki şəxslərin gəlir vergisi üzrə daxilolmaların 690 milyon manat artaraq 3 milyard 70 milyon manata çatacağı gözlənilir. Proqnozlaşdırılan 29 faizlik artım 2026-cı ildən vergi güzəştlərinin mərhələli ləğvi fonunda baş verir.

Gələn il büdcə kəsirinin xərclərlə gəlirlər arasındakı fərqin 3 milyard 166 milyon manat olacağı nəzərdə tutulur.
Neft-qaz gəlirlərinin azalması hökumətin sonrakı illər üçün proqnozlarında da əksini tapır. Maliyyə Nazirliyinin 2026-2030-cu illərə dair hesablamalarına görə, bu dövrdə neft-qaz gəlirləri 25,5 faiz azalacaq, ümumi büdcə gəlirləri isə cəmi 5,1 faiz artacaq.