Aprelin 28-də Bakı Ağır Cinayətlər Məhkəməsində “Meclis.info işi” üzrə növbəti məhkəmə iclası keçirilib.

"Abzas Media"nın xəbərinə görə, hakim Roman Ələkbərlinin sədrliyi ilə keçirilən prosesdə təqsirləndirilən şəxslərdən "Meclis.info" saytının rəhbəri İmran Əliyev sərbəst ifadə verib.

İ.Əliyev çıxışında ABŞ səfirliyindən və beynəlxalq təşkilatlardan maliyyə aldığını, lakin vergi ödədiyini bildirib. 

O, daha sonra 2024-cü ilin aprelində Bakıda hava limanında saxlanıldığı zaman zorakılığa məruz qaldığını deyib. 

"Hava limanı ərazisindən zorla çıxarılaraq Bakı Şəhər Baş Polis İdarəsinə (BŞBPİ) gətirildim. Yolboyu və daha sonra idarədə başımda qara torba olub, zorakılığa məruz qalmışam. Ara-sıra başımdan torbanı çıxararaq sənədlərə imza atmağımı tələb edirdilər. Bunların hamısı vəkilim olmadan edilirdi. Sənədlərlə tanış olmaq, yaxud nəsə fikir bildirmək istəyəndə mənə elektrik verib şillə-yumruq vuraraq deyirdilər ki, ‘gecdir, evə, arvad-uşağın yanına getməliyik’”, - o bildirib. 

İ.Əliyev ittihamları rədd edib, həbsinin siyasi sifariş olduğunu və ictimai fəaliyyətini məhdudlaşdırmaq məqsədi daşıdığını deyib. O, dövlət ittihamçısı və məhkəmə heyətinin suallarını cavablandırmaqdan imtina edib.

İ.Əliyev daha sonra vəsatətlər verib. O, saxlanıldığı zaman ona işgəncə verən şəxslərin məsuliyyətə cəlb olunmasını, ibtidai istintaq dövründə müdafiə hüququnun pozulması faktının tanınmasını, istintaq zamanı qəbul edilən qərarların qanunsuz hesab edilməsini, həmin qərarları qəbul edən vəzifəli şəxslərin məsuliyyətə cəlb olunmasını və iş materiallarında olan video və audio sübutlarla tanış olmaq üçün şərait yaradılmasını istəyib. Məhkəmə yalnız sonuncu vəsatəti təmin edib. 

Növbəti məhkəmə prosesi mayın 5-ə təyin edilib.

İmran Əliyev 2024-cü il aprelin 18-də Heydər Əliyev Beynəlxalq Hava Limanında saxlanılıb. Ona qarşı əvvəlcə Cinayət Məcəlləsinin 206.3.1 və 206.3.2 (qaçaqmalçılıq) maddələri ilə ittiham irəli sürülüb, sonradan bu siyahı 8 maddəyə qədər genişləndirilib.

İctimai fəal Elgiz Qəhrəman və Tamella Musayeva da eyni iş üzrə təqsirləndirilən şəxs qismində ötən ilin fevral ayında cinayət məsuliyyətinə cəlb olunublar. Onlar barəsində polis nəzarəti qətimkan tədbiri seçilib.

Hazırda hər üç şəxs 12 ilədək həbs cəzası nəzərdə tutan 8 ağır maddə ilə ittiham olunur.