“Meydan TV”nin həbs olunan əməkdaşı Aytac Əhmədova (Tapdıq) saxlandığı təcridxanada nikaha daxil olmaq hüququnun pozulduğunu deyir.

1 saylı Bakı İstintaq Təcridxanasında saxlanılan jurnalist bildirir ki, yanvar ayından nikaha daxil olmaq üçün ərizə yazsa da, zəruri prosedurlardan keçməsinə icazə verilmir. 

O qeyd edir ki, “Meydan TV işi” ilə məşğul olan Bakı Şəhər Baş Polis İdarəsinin (BŞBPİ) müstəntiqi Samir İsmayılov öncə jurnalistə bunun problem olmadığını desə də, sonradan icazə verilmədiyini bildirib.

“Bu isə bu qanunsuz qadağanın BŞBPİ-dən yox, əsl “istintaq qrupundan” gəldiyini göstərir. Saxta ittiham əsasında həbs edilməyim azmış kimi, heç bir rəsmiyyətə dayanmayan, qeybdən gələn səs nikah bağlamağıma veto qoyur”, – Tapdıq həbsdən yazır.

Jurnalistin evlənmək istədiyi şəxs isə heyvan haqları fəalı Kamran Məmmədlidir.

Ötən ilin noyabrın 15-də Bakıda BMT-nin iqlim dəyişikliyi konfransında təkadamlıq etiraz aksiyası keçirdiyi zaman mühafizə xidməti tərəfindən saxlanılan Məmmədliyə qarşı ölkədən çıxış qadağası var.

“Bu qadağa həm mənim, həm də evlənmək istədiyim insan haqları və heyvan haqları müdafiəçisi Kamran Məmmədlinin fəaliyyətinə yönəlmiş təzyiqdir. Necə ki, jurnalist fəaliyyətimə görə üzləşdiyim qaçaqmalçılıq ittihamı tamamilə qanunsuzdur, eləcə də rəsmi nikahıma qarşı verilən şifahi rədd cavablarının heç bir hüquqi əsası yoxdur”, - Tapdıq bildirir. 

2016-cı ildə Müsavat Partiyasının üzvü Nigar Yaqublunun həbsdə olan Azərbaycan Xalq Cəbhəsi Partiyasının sədr müavini Seymur Həzi ilə evlənməsinə də əngəl yaranması geniş müzakirə mövzusu olmuşdu. 

Həmin vaxt 4 saylı “ASAN xidmət” nikahı bağlamaqdan imtina etsə də, bir gün sonra nikah bağlanmışdı. 

2024-cü il dekabrın 6-da  Meydan TV-nin Azərbaycan nümayəndəliyinin rəhbəri Aynur Elgünəş, jurnalistlər Ramin Deko, Aynur Elgünəş, Aysel Umudova, Aytac Tapdıq, Xəyalə Ağayeva, Natiq Cavadlı saxlanılıblar. Onlara qarşı qaçaqmalçılıq, əvvəlcədən əlbir olan bir qrup şəxs tərəfindən törədildikdə maddəsi ilə ittiham irəli sürülüb. 

Meydan TV əməkdaşları ilə yanaşı, eyni gündə vətəndaş cəmiyyətinin üzvü Ülvi Tahirov da saxlanılıb. Eyni ittihamla onun da barəsində 4 aylıq həbs qətimkan tədbiri seçilib. Onun Meydan TV-yə aidiyyəti yoxdur.

Jurnalist Şəmşad Ağa bu ilin fevralın 5-də “Meydan TV işi” ilə bağlı saxlanılıb və barəsində 2 ay 1 gün müddətinə həbs qətimkan tədbiri seçilib. 

Fevralın 20-də isə jurnalist Nurlan Libre də bu işlə əlaqəli saxlanılıb və barəsində 1 ay 17 gün müddətinə həbs qətimkan tədbiri seçilib.

Fatimə Mövlamlı da fevralın 28-də “Meydan TV” ilə əlaqəli cinayət işinə görə saxlanılıb və barəsində 1 ay 9 gün müddətinə həbs qərarı verilib.

Saxlanılan jurnalistlərin heç biri özünü təqsirli bilmir.