"Abzas Media"nın həbsdə olan əməkdaşı Elnarə Qasımova saxlanıldığı Bakı İstintaq Təcridxanasında qadın məhbuslarla rəftar barədə məktub yazıb. 

"Abzas Media"nın dərc etdiyi məktubda E.Qasımova hərəsi 3 mərtəbə olmaqla 8 korpusdan ibarət təcridxanada yalnız bir mərtəbənin qadınlara ayrıldığını bildirib. 

"Kişilərin saxlanıldığı mərtəbələrdə say maksimum 100 nəfər olsa da, 150, bəzən 200 nəfərə çatan qadınlar cəmi bir mərtəbəyə sığışdırılıb. Buna görə yaranan sıxlıq, yer, yataq çatışmazlığı və özü ilə gətirdiyi bir çox maneələrlə qadınlar baş etməli olurlar. Səslərini çıxarıb etiraz edəndə də nəzarətçilərdən bir söz eşidirlər: “Özünüzü kişilərə göstərirsiniz?”", - o qeyd edib. 

Jurnalist qadın məhbusların geyimi, makiyajı, davranış tərzi, hətta danışıq tonuna qadın nəzarətçilərin müdaxilə etdiyini yazıb. 

"Mərtəbələrin dəhlizlərinin ortası açıqdır, lambrinlərlə örtülüb. Hər mərtəbədə olan danışıqlar digər mərtəbələrdə eşidilir. Qadınların səsi yüksələn kimi nəzarətçilərin ilk dediyi “Ayıbdır, kişilər eşidir” olur. Burada qadınların hər hərəkəti kişi gözü ilə saf-çürük edilir", - o bildirib. 

"Qadınları dizdən yuxarı ətəklə və ya bədənə kip oturmuş şalvarla görən nəzarətçi səsini başına atıb “Bu, nə geyimdir? Kişilər var”, “Uzun geyin, kişilər var”, “Pomadan çox deyil? Kişilər var”,- deyə gileylənirlər. Qadın məhbuslar kameralarına geri qaytarılır və geyimləri kişilərin tələblərinə uyğunlaşdırılır", - jurnalist əlavə edib. 

E.Qasımova ardınca təcridxanada qadınların şəxsi yazışmalarına müdaxilələri təsvir edib. O yazıb ki, qadın məhbusların kişilərə yazdığı məktublar müsadirə olunur, oxunur və bütün təcridxana boyu məsxərəyə qoyulur. 

Rəhbərliyin qadın məhbuslara münasibətinə toxunan jurnalist bildirir ki, təcridxana rəisi Elnur İsmayılov demək olar ki, qadınların korpusuna baş çəkmir. 

Onun sözlərinə görə, rəis müavinləri Cavid Güləliyev və Əhəd Abdiyev də qadın məhbusların geyim və makiyajına qarışmaya bilmir. Güləliyevin hətta qadın nəzarətçilərlə də kobud danışdığı qeyd olunur. 

Digər rəis müavini Arif Heydərovun isə qadınlara hətta fiziki zorakılıq etdiyi bildirilir. 

"O, qadınlara yumruq, təpik vuraraq təhqiramiz sözlər işlədir. Haqqında yazılan şikayətlərlə bağlı nə təcridxana daxilində araşdırma aparılıb, nə də prokurorluq təhqiqat başladıb. Bu cəzasızlıq onun əl-qolunu daha da açır, zorakılıq hərəkətlərini artırır", - jurnalist vurğulayıb. 

E.Qasımova bütün pis rəftara baxmayaraq, təcridxana rəisi və Ədliyyə Nazirliyinin hər il 8 martda qadın məhbuslara qızılgül və kosmetika verdiyini deyib. 

"İl boyu tikan batırdıqları qadınlara bir gün gəlib gül verirlər. Və “dostunuz”, “qardaşınız“la başlayan təbriklər kamera-kamera dolaşır. Təcridxanadakı alçaldıcı davranışlar isə o qızılgüllər solmamış yenidən başlayır", - o əlavə edib.