Zaqatala rayon sakini Əhmədov Cavid 44 günlük müharibədə iştirak etsə də, ona veteranlıq statusu verilməyib. Şikayətçinin sözlərinə görə onunla eyni vaxtda müharibədə iştirak edən hər kəsə bu status verilib.

“2020-ci ildə həqiqi hərbi xidmətə çağırıldım. İlk xidmətimi Ağcabədi ərazisində keçirdim. 44 günlük müharibə ərəfəsində isə Füzuli, Xocavənd, Cəbrayıl, Qubadlı və Laçın uğrunda gedən döyüşlərdə iştirak etmişəm. Füzuli və Xocavənd uğrunda gedən döyüşlərə görə medallarla təltif edilmişəm. Ancaq veteranlıq statusum hələ də verilməyib. Necə olur ki, medallar verilir, hərbi biletimə müharibədə iştirak etdiyim qeyd edilir, ancaq veteranlıq statusu verilmir. Mən veteranlıq statusumun verilməsini tələb edirəm”.

Müdafiə Nazirliyinin Mətbuat Xidmətinin sözçüsü Anar Eyvazov Toplum TV-yə açıqlamasında müharibə iştirakçısı Əhmədov Cavidin adının siyahıda olmadığını dedi: “Vətəndaş DOST Agentliyinə və ya Müdafiə Nazirliyinə yaxınlaşsın və ona təqdim edilən blankı doldursun. Bundan sonra ona siyahı veriləcək. Siyahıda olan sənədləri toplayıb Nazirliyə təqdim etsin”.

https://toplum.tv/qaynar-xett/sehid-atasi-ona-verilen-torpagin-ve-tikilen-evin-senedini-ala-bilmediyini-deyir

Müharibə iştirakçısının adının siyahıda olmama səbəbinə gəlincə isə qurum rəsmisi bunun səbəbini bizə yox, vətəndaşın özünə deyəcəklərini bildirdi.

Şikayətçi Əhmədov Cavid  isə deyir ki, necə olur, “hərbi biletimə müharibədə iştirakım yazılanda Nazirliyin xəbəri olur, medal veriləndə adım Nazirliyin siyahısında olur, ancaq veteranlığa gələndə olmur”.

Məsələ ilə bağlı “Qarabağ qaziləri” İctimai Birliyinin mətbuat katibi, Qarabağ qazisi Rey Kərimoğlu Toplum TV-yə hazırda adı veteranlıq siyahısına düşməyən 12 min 500 vətəndaşın olduğunu dedi: “Hazırda onların adlarının sistemə vurulma prosesi gedir. Görünür ki, Müdafiə Nazirliyinin o məsələlərində çox ciddi problemlər, nöqsanlar var. Vətəndaşa döyüşdüyü üçün medallar verilir, amma veteranlıq vəsiqəsi verilmir. Bu yolverilməz haldır, ciddi nöqsanlardır. Müdafiə Nazirliyi bu problemləri həll etməlidir”.

https://toplum.tv/qaynar-xett/mingecevir-icra-hakimiyyeti-sehid-ogluna-ev-verileceyini-ved-etdi

Veteranlara aylıq təyin edilən 80 manat vəsaitin verilməsi məsələsinə gəlincə isə, R. Kərimoğlu dedi ki, vətəndaşa həmin pul yanvardan hesablanıb verilməlidir: “Əvvəllər bir sıra müharibə iştirakçıları onlara gecikmiş veteranlıq təyin edildikdən sonra, məhkəməyə müraciət edərək 3 ilin veteranlıq pulunu alıblar. Veteranlar üçün hansı tarixdən 80 manat vəsait verilməsi qərara alınıbsa, elə həmin andan pul hesablanaraq vətəndaşa ödənilməlidir”.

"Toplum TV" mövzunu diqqətdə saxlayacaq.