Həbsdə olan siyasətçi, Müsavat Partiyasının və Milli Şuranın üzvü Tofiq Yaqublunun saxlanıldığı 17 saylı Cəzaçəkmə Müəssisəsində şəraitin pisləşməsinə etiraz olaraq ailəsinə zəng etməkdən imtina etdiyi deyilir. Bu barədə siyasətçinin qızı Nigar Həzi məlumat yayıb.
N.Həzi bildirib ki, Yaqublu həbsxanadakı problemlərlə bağlı müəssisə rəisi ilə görüşmək üçün dəfələrlə rəsmi müraciət edib.
“Tofiq Yaqublu həbsxanadakı dözülməz şərait və problemlərlə bağlı dəfələrlə 17 saylı Cəzaçəkmə Müəssisəsinin rəisi Şəfaət Abbasovun qəbuluna düşmək üçün rəsmi müraciət etsə də, rəis onunla görüşməkdən boyun qaçırır. Onun televizordan istifadə imkanı əlindən alınıb. Həbsxanada yeganə informasiya mənbəyi televizordur. Bundan əlavə, kiçik otaq və baraklarda nəzərdə tutulandan daha çox məhbus yerləşdirilib. Xeyli məhbus çarpayı çatışmazlığı səbəbindən yerdə yatır. Bir qədər böyük otağı boşaldaraq ora bir televizor qoyublar və bildiriblər ki, 300-400 məhbus yalnız bu televizordan istifadə edə bilər”, - siyasətçinin qızı yazıb.

O, həmçinin Ombudsman Aparatının nümayəndələrinin noyabrın 13-də 17 saylı Cəzaçəkmə Müəssisəsinə gəldiyini, lakin Tofiq Yaqublu ilə görüşmədiyini bildirib.
N.Həzi siyasi məhbusların saxlanıldığı müəssisələrdə təzyiqlərin artdığını deyib və bunu Penitensiar Xidmətin yeni rəisi Sahib Rzayevin təyinatından sonra tətbiq edilən qaydalarla əlaqələndirib.
Noyabrın 12-də Yaqublunun ailəsi onun adətən zəng etdiyi vaxtda evlə əlaqə saxlamamasından narahat olduğunu açıqlamışdı. Həmin vaxt Nigar Həzi atasının həbsxanada təzyiqlərlə üzləşdiyini də bildirmişdi.

“Toplum TV” iddialarla bağlı Penitensiar Xidmət münasibət öyrənə bilməyib.

Tofiq Yaqublu ötən il martın 10-da Bakı Ağır Cinayətlər Məhkəməsinin hökmü ilə 9 il müddətinə azadlıqdan məhrum edilib. O, külli miqdarda ziyan vurmaqla dələduzluq, habelə saxta sənəd hazırlama və ya istifadə etmə ittihamları ilə təqsirli bilinib. Yaqublu ittihamları siyasi motivli sayır.