“Amnesty International” insan hüquqları təşkilatı həbsdə olan “Meydan TV” jurnalistləri Aynur Elgünəş, Aytac Tapdıq və Şəmşad Ağanın səhhətinin kritik olduğunu bildirərək onların dərhal və qeyd-şərtsiz azad edilməsinə çağırıb.

Təşkilatın oktyabrın 30-da yaydığı “Təcili tədbir” sənədində qeyd olunur ki, böyrək xəstəliyi səbəbindən təcili əməliyyata ehtiyacı olan “Meydan TV”nin baş redaktoru Aynur Elgünəş oktyabrın 18-də Penitensiar Xidmətin müalicə müəssisəsinə köçürülsə də, həkimlərin tövsiyə etdiyi əməliyyat hələ həyata keçirilməyib.
“Onun səhhəti hər gün ağırlaşır və təcili əməliyyata ehtiyacı var”, - təşkilat bildirib.

“Amnesty International”ın məlumatına görə, oktyabrın 26-da Bakı Ağır Cinayətlər Məhkəməsi Elgünəşin vəkillərinin ev dustaqlığı ilə əvəzlənmə barədə vəsatətini rədd edib. Sənəddə jurnalist Aytac Tapdığın burun çəpərinin əyriliyi ilə bağlı 22 aydan çoxdur zəruri tibbi yardımdan məhrum edildiyi, mədə xorası olan Şəmşad Ağanın da müalicəyə ehtiyacı olduğu vurğulanır.

Təşkilat “Meydan TV” jurnalistlərinin cinayət təqibini onların müstəqil jurnalist fəaliyyəti ilə əlaqələndirib.
“Onların təqibi Azərbaycanda müstəqil mediaya qarşı getdikcə güclənən təzyiqlərin tərkib hissəsidir”, - açıqlamada deyilir.

“Amnesty International” həmçinin “Toplum TV” və “Abzas Media” ilə əlaqəli həbsdə olan jurnalistlərin də ehtiyac duyduqları tibbi yardımı almaqda oxşar problemlərlə üzləşdiyini qeyd edib. Təşkilat bu halların qəddar, qeyri-insani və ya ləyaqəti alçaldan rəftar kimi qiymətləndirilə biləcəyini bildirib.

“Amnesty International” ictimaiyyəti Azərbaycan prezidenti İlham Əliyevə müraciət göndərməyə çağırıb.
Təşkilat jurnalistlərin dərhal və qeyd-şərtsiz azad olunmasını, onların zəruri tibbi yardımla təmin edilməsini, işgəncə və pis rəftar iddialarının müstəqil şəkildə araşdırılmasını tələb edir.
Müraciətdə Azərbaycanda müstəqil medianın və dinc etirazların cinayət təqibi vasitəsilə hədəfə alınmasına son qoyulması da istənilir.

Təşkilat çağırış kampaniyasını 2027-ci il yanvarın 30-dək davam etdirəcək.