İranın gömrük işçilərinin son günlərdə azərbaycanlı yük maşını sürücülərinə problemlər yaratdığı bildirilir. 

Bu barədə “Gündəlik Naxçıvan” səhifəsi sürücülərə istinadən xəbər yayıb. 

Buna avqustun 8-də Vaşinqtonda ABŞ, Azərbaycan və Ermənistan arasında razılaşdırılan, Azərbaycanı Naxçıvana birləşdirəcək “Tramp marşrutu"nun səbəb olduğu qeyd olunub. 

“Naxçıvandan Bakıya yük daşıyan sürücülər günlərlə ac-susuz, çöllük ərazidə toz-torpaq içində gözlədildikdən sonra Azərbaycana buraxılırlar”, - xəbərdə deyilir. 

Məlumata görə, iranlı gömrük rəsmiləri azərbaycanlı sürücülərə ironiya ilə “Tramp marşrutu“ndan istifadə etməyi məsləhət görüblər. 
 
Sürücülər səhifəyə etdikləri müraciətlərində bildirir ki, Biləsuvar gömrük keçidində növbə olduğunu bəhanə gətirərək onları xeyli aralıdakı çöllüyə göndərirlər. 

“Burda nə yemək var, nə də su. Nəsə almaq üçün gərək kilometrlərlə yolu piyada gedəsən. Bir neçə gündür belə ediblər. Əvvəl gömrüyün qarşısında bir neçə saat gözlədikdən sonra buraxılırdıq. Sülh sazişi imzalandıqdan sonra bizi və türkiyəli sürücüləri  gətirib, çöllüyə doldurublar, günlərlə gözləməyə məcbur edirlər. Kefləri gələndə 1-2 maşın buraxırlar. Ac-susuz, toz-torpaq içində gözləməyimiz bir tərəfə, burada tualet də yoxdur. Həm də, bizimlə heyvan kimin davranırlar”, - sürücülər deyib. 

Avqustun 8-də Vaşinqtonda ABŞ, Azərbaycan və Ermənistan liderlərinin verdiyi birgə bəyannamədə qeyd olunan məsələlərdən biri də Azərbaycanı Naxçıvana birləşdirəcək, “Tramp marşrutu” adlanan yoldur. 

Bəyannamənin 4-cü maddəsində deyilir ki, Ermənistan öz ərazisində “Beynəlxalq Sülh və Rifah naminə Tramp Marşrutu” (TRIPP) bağlantı layihəsi üçün çərçivənin müəyyən edilməsi məqsədilə ABŞ və qarşılıqlı müəyyən edilmiş üçüncü tərəflər ilə əməkdaşlıq edəcək. “Biz bu məqsədə ən qısa zamanda nail olmaq üçün xoş niyyətlə səy göstərməyə dair qətiyyətimizi təsdiq edirik”, - deyə qeyd olunub. 

İran prezidenti Məsud Pezeşkian “TRIPP”-lə bağlı ölkəsinin “yeganə narahatlığının” yolun ABŞ şirkəti tərəfindən tikilməsi olduğunu desə də, İran ali lideri Seyid Əli Xameneinin müşaviri Əli Əkbər Vilayəti bu mövzuda daha sərt çıxış edib. 
O bildirib ki, İran marşruta qarşı çıxacaq.