Demokratik Təşəbbüslər İnstitutunun (IDI) “Toplum TV işi” üzrə həbsdə olan əməkdaşları Ramil Babayev və İlkin Əmrahov cəzaçəkmə müəssisələrində zəruri ehtiyac mallarının paylanılması barədə yazıblar.

Yazını olduğu kimi təqdim edirik.

“Məhbuslara zəruri ehtiyac mallarının paylanılması barədə siyasi məhbuslar dəfələrlə yazıb.

Reallığın icmalı budur ki, Penitensiar Xidmət (PX) 2-3 ildən bir məhbusların yalnız bir hissəsinə zəruri ehtiyac mallarını paylayır. Yəni, həbsxana sabununu, diş pastasını üç ildə bir dəfə, o da lotereya qazanmış azlığın içində təsadüfən yer almışsınızsa, əldə edə biləcəksiniz.

Biz bu gün malların paylanmamasından yox, ad üçün paylanılan məhsulların keyfiyyətindən bəhs edəcəyik. Elə həmin sabunun və diş pastasının keyfiyyətindən başlayaq. Paylanılan sabunun qablaşdırılması yoxdur. Üzərində mənşəyi və istehsalçının adı yoxdur. Üstəlik, həmin sabun un kimi ovulur. Diş pastasını ilk dəfə görən məhbuslar “Colgate” şirkətinin məhsulunun qablaşdırılmasını görüb təəccüblənirlər. Lakin yalnız diqqətlə baxanda adın “Coigare” olduğunu və “Colgate” qablaşdırılmasında olan saxta Çin məhsulu verildiyini görə bilirlər.

Penitensiar Xidmət üç ildən bir dəsmal adı ilə çay dəsmalından da kiçik əski parçası verir. Penitensiar Xidmətin verdiyi yataq örtükləri də tapa bildikləri ən keyfiyyətsiz məhsullardır. Bu örtüklərdən saçılan hissəciklər, tüklər hər gün kamerada yerlərə səpələnir.

Penitensiar Xidmətin verdiyi yastıqların isə içliyi o qədər seyrəkdir ki, yastığın varlığı ilə yoxluğu arasında fərq hiss etmək çətindir. Yuxarıda qeyd etdiklərimizin nəticəsində bəzi məhbuslar döşək olmadığı üçün quru taxtaların üzərində yatır. Yastıq əvəzinə qalın paltarlardan istifadə edirlər. Üzərlərini örtməyə nazik örtük belə tapmırlar. Xüsusilə Bakı İstintaq Təcridxanasında belə hallara dəfələrlə birbaşa şahidlik etmişik. Penitensiar Xidmət rəhbərliyi, axı insaf da yaxşı şeydir”.

İyulun 27-də Bakı Ağır Cinayətlər Məhkəməsində “Toplum TV işi” üzrə hökm elan olunub. Hökmə əsasən, Akif Qurbanov və Ruslan İzzətli 15, Ələsgər Məmmədli və Əli Zeynal 14, Ramil Babayev, İlkin Əmrahov və Müşfiq Cabbar 13, Fərid İsmayılov 12, Elmir Abbasov isə 11 il 11 ay 28 gün müddətinə azadlıqdan məhrum edilib. Elmir Abbasov məhkəmə zalında həbs olunub.
Məhkum olunanların hər biri, həmçinin 2 il 6 ay müddətinə müəyyən vəzifə tutmaq hüququndan məhrum edilib.

Məhkəmə onlara qarşı qaldırılmış mülki iddianı da təmin edib. Dövlət ittihamçısının vəsatəti əsasında üzərinə həbs qoyulmuş avtomobillərin və evlərin müsadirəsinə qərar verilib.