Yeni Azərbaycan Partiyası (YAP) Türkiyə prezidenti Rəcəb Tayyib Ərdoğanın baş müşaviri Oktay Saralın və hakim Ədalət və İnkişaf Partiyasının (AKP) bəzi deputatlarının Azərbaycandakı hicab məsələsi ilə bağlı açıqlamalarını tənqid edib.

Partiya bildirib ki, Azərbaycan-İsrail münasibətlərinin məqsədli şəkildə təhrif olunması və bu əlaqələr fonunda ölkəyə qarşı siyasi ittihamların səsləndirilməsi qəbuledilməzdir. Açıqlamada Azərbaycanın Fələstin məsələsində mövqeyinin dəyişməz olduğu, ölkənin iki dövlətli həlli dəstəklədiyi qeyd olunub.
“Azərbaycan Fələstin məsələsinin beynəlxalq hüquq və BMT-nin müvafiq qətnamələri əsasında, Şərqi Qüdsün Fələstin Dövlətinin paytaxtı olması şərtilə iki dövlət prinsipi əsasında həllini dəstəkləyir”, - deyə bəyanatda bildirilib.

YAP Türkiyədən olan bəzi siyasi fiqurların Azərbaycanın konstitusion quruluşunu və dini etiqad azadlığının hüquqi əsaslarını nəzərə almadan “populist və məsuliyyətsiz” açıqlamalar verdiyini bildirib. Partiyanın fikrincə, təhsil sahəsindəki qaydalar dünyəvilik, bərabərlik və qanunun aliliyi prinsiplərinə əsaslanır.

“AKP iqtidarını hicab məsələsindən Azərbaycana qarşı siyasi təzyiq vasitəsi kimi istifadə olunması kimi zərərli siyasətdən çəkinməyə çağırırıq”, - açıqlamada deyilib.

Bəyanatda keçmiç prezident Heydər Əliyevin “Bir millət, iki dövlət” prinsipinin iki müstəqil dövlət arasında qarşılıqlı hörmətə əsaslandığı bildirilib. YAP bu prinsipin dövlətlərdən birinin digərinin daxili işlərinə müdaxiləsi və ya öz siyasi-ideoloji yanaşmalarını qəbul etdirməsi üçün əsas yaratmadığını qeyd edib.

Son günlər Azərbaycanda bir sıra dövlət ümumi təhsil məktəblərində hicablı şagirdlərin dərsə buraxılmadığı bildirilir. Hicablı müəllimlər də hicablarını açmaq və ya işdən çıxmaq seçimi qarşısında qoyulduqlarını deyirlər.

Məlumata görə, məktəb rəhbərlikləri bu məhdudiyyətləri tətbiq edərkən Nazirlər Kabinetinin sentyabrın 21-də şagirdlər, oktyabrın 6-da isə müəllimlər üçün qəbul etdiyi geyim qaydalarına istinad edir.
Qaydalarda hicabın qadağan olunduğu göstərilməsə də, geyim formalarının dünyəvilik prinsipinə uyğun olmalı olduğu qeyd edilir.

Qərar inanclı fəalların və valideynlərin etirazına səbəb olub. Onlar qərarın hicablı şagirdlərin təhsil hüququnu məhdudlaşdırdığını bildirirlər.

Daxili İşlər Nazirliyi (DİN) dövlət məktəblərində vahid geyim qaydalarının tətbiqi ilə bağlı baş verən insidentlərə görə 37 nəfərin saxlanıldığını bildirib.

Nazirliyin iddiasına görə, Bakıda bir qrup şəxs geyim qaydalarının tətbiqi ilə bağlı təhsil işçiləri ilə münaqişə yaradıb, təhsil müəssisələrinə zərər vurub və məktəblərin normal fəaliyyətinə mane olmağa cəhd edib.
DİN faktla bağlı Cinayət Məcəlləsinin 233-cü maddəsi ilə cinayət işi başladıldığını açıqlayıb. Həmin maddə ictimai qaydanın pozulmasına səbəb olan hərəkətləri təşkil etməyi və ya bu cür hərəkətlərdə fəal iştirak etməyi nəzərdə tutur.