Macarıstan parlamenti LGBTQ+ şəxslərin hüquqlarını məhdudlaşdıran müddəaların 2021-ci ildə qəbul olunmuş “uşaqların müdafiəsi haqqında” qanundan çıxarılmasına səs verib.

Oktyabrın 13-də keçirilən səsvermədə hakim “Tisa” partiyasından olan 139 deputat dəyişikliklərin lehinə, 51 deputat isə əleyhinə çıxış edib.

Viktor Orban hökuməti dövründə qəbul edilən əvvəlki qanun 18 yaşdan kiçik şəxslər üçün homoseksuallığın və transgenderliyin “təbliğini” qadağan edirdi. Bu müddəalar LGBTQ+ mövzularının məktəblərdə, mediada və reklamlarda təqdimatını məhdudlaşdırmaq üçün istifadə olunurdu. Qanun həmçinin “Pride” yürüşlərinin qadağan edilməsinə hüquqi əsas yaratmışdı.

Yeni redaktədə LGBTQ+ şəxslərə və ya gender kimliyinə dair birbaşa qeyd yoxdur. Sənəddə yalnız uşaqların fiziki, intellektual, emosional və mənəvi inkişafına ciddi zərər vura biləcək materiallardan qorunmasının vacibliyi vurğulanır.

Baş nazir Peter Madyar bildirib ki, yeni formulasiya uşaqları seksual oriyentasiyasından asılı olmayaraq daha yaxşı qoruyur.

Avropa İttifaqı Macarıstan parlamentinin qərarını alqışlayıb. Apreldə Aİ Məhkəməsi Macarıstanın LGBTQ+ məzmununa qoyduğu məhdudiyyətlərin Avropa hüququna və birliyin əsas dəyərlərinə zidd olduğunu müəyyən etmişdi.

Bununla belə, hüquq müdafiəçiləri ölkədə LGBTQ+ şəxslərə qarşı digər məhdudiyyətlərin qüvvədə qaldığını bildirirlər. Onların sırasına eynicinsli cütlüklərin uşaq övladlığa götürməsinə məhdudiyyətlər, transgender şəxslərin hüquqi tanınması ilə bağlı qadağalar və “Pride” yürüşlərinə tətbiq olunan məhdudiyyətlər daxildir.

LGBTQ+ mövzularının “təbliğatı” ilə bağlı məhdudiyyətlər Rusiyada da qüvvədədir. Orada qadağa əvvəlcə uşaqlara yönəlmiş məzmunu əhatə edib, daha sonra böyüklər üçün də genişləndirilib. 

Gürcüstanda isə 2024-cü ildə qəbul olunan qanun LGBTQ+ münasibətlərinin mediada və təhsil müəssisələrində “təbliğini” məhdudlaşdıran müddəaları da əhatə edir. Bolqarıstanda məktəblərdə “qeyri-ənənəvi seksual oriyentasiyanın təbliği”ni qadağan edən norma tətbiq olunur.

Azərbaycanda LGBTQ+ “təbliğatı”nı qadağan edən ayrıca qanun yoxdur. Lakin bu ilin fevralında deputat Cavanşir Paşazadə LGBTQ+ mövzularının media və televiziyada müzakirəsini “təbliğat” adlandıraraq qanunvericiliyin sərtləşdirilməsinə çağırmışdı. Bu çağırışdan sonra Rusiyadakı modelə bənzər qadağanın Azərbaycanda da tətbiq oluna biləcəyi ilə bağlı müzakirələr yaranıb.