“Reuters” agentliyi İrandakı onlayn qumar şəbəkəsinin 4 milyard dollarlıq vəsaiti ölkədən çıxarmağa kömək etdiyini yazıb. 

Agentliyin araşdırmasında iddia olunur ki, buna Dubayda yerləşən “Shelbit” adlı kriptovalyuta birjası vasitəsilə nail olunub. 

“Reuters”-in təhlil etdiyi “blokçeyn” məlumatlarına əsasən, “Shelbit” 2 mindən çox internet saytını əhatə edən qumar şəbəkəsinin maliyyə əməliyyatlarını həyata keçirib. Birja həmçinin beynəlxalq sanksiyalar altında olan İran Mərkəzi Bankı, kriptovalyuta birjası “Nobitex” və İran İslam İnqilabı Keşikçiləri Korpusu (SEPAH) ilə əlaqələndirilən kriptovalyuta hesabları ilə əməliyyatlar aparıb. 

“Reuters” müəyyən edib ki, 2024-cü ilin may ayından etibarən bu hesablardan dünyanın ən böyük kriptovalyuta birjası olan “Binance” platformasına azı 676 milyon dollar köçürülüb. Məlumatlara görə, “Shelbit” İran Mərkəzi Bankı ilə əlaqəli azı 125 milyon dollar dəyərində əməliyyatı emal edib. 

Birja həmçinin iranlı influenserlər Saşa Sobhani və Puyan Moxtari tərəfindən reklam olunan qumar saytları ilə əlaqəli maliyyə əməliyyatlarını da həyata keçirib. Hər iki şəxs “Shelbit” barədə məlumatlarının olduğunu və ya sanksiyalardan yayınma və çirkli pulların yuyulması kimi işlərdə iştirak etdiklərini təkzib edib. 

Araşdırmada o da iddia olunur ki, SEPAH illər əvvəl iri qumar saytlarına nəzarəti ələ keçirərək onları ölkədən kənara pul vəsaitləri çıxarmaq üçün istifadə edib. Lakin agentlik SEPAH-ın birbaşa “Shelbit” və ya bütövlükdə qumar şəbəkəsinə nəzarət edib-etmədiyini, eləcə də vəsaitlərin nəticə etibarilə hara yönəldiyini müəyyən edə bilməyib. 

Dubayın Virtual Aktivləri Tənzimləmə üzrə icra orqanı (VARA) bildirib ki, “Shelbit” lisenziyasız fəaliyyət göstərdiyi üçün əvvəllər də ona qarşı icra tədbirləri görülüb. Qurum iyulun 24-də çirkli pulların yuyulması, terrorçuluğun maliyyələşdirilməsi və qanunsuz maliyyə əməliyyatları ilə bağlı narahatlıqları əsas gətirərək birjaya fəaliyyətini dayandırmağı əmr edib. Hazırda birjanın saytına giriş mümkün deyil. 

“Binance” isə bildirib ki, “Shelbit” heç vaxt onların platformasında hesab açmayıb və bu birja ilə əlaqələndirilən əməliyyatlar ilkin mərhələdə yüksək riskli hesab edilməyib. Şirkətin sözlərinə görə, aidiyyəti hesablar sonradan araşdırılıb, dondurulub və hüquq-mühafizə orqanlarına məlumat verilib.

“Shelbit”, İran hökuməti və SEPAH “Reuters”-in şərh sorğularını cavablandırmayıb.