ABŞ prezidenti Donald Tramp İsrailin baş naziri Benyamin Netanyahu ilə söhbətində onu İranla münaqişənin daha da kəskinləşməsinin mümkün nəticələri barədə xəbərdar etdiyini açıqlayıb. Bu barədə o, İsrailin “N12” telekanalına müsahibəsində danışıb.

“Onu xəbərdar etdim ki, addımlarında çox ehtiyatlı olmalısan. Çünki çox tezliklə İranla qarşı tək qala bilərsən”, - deyə Tramp bildirib.

ABŞ prezidentinin sözlərinə görə, iyunun 7-də Netanyahu ilə telefon danışığı zamanı o, İsrail liderindən İranın zərbələrinə cavab verməməyi xahiş edib. Tramp iddia edir ki, sonradan İsrail tərəfi Vaşinqtonu planlaşdırılan əməliyyat barədə yalnız hazırlıqların son mərhələsində məlumatlandırıb.

“İsraillilər bizə yenilənmiş məlumatı çox gec təqdim etdilər. Onlar artıq İrana doğru hərəkət edirdilər. Mən hücumun miqyasını azaltmağa nail oldum”, - deyə ABŞ prezidenti vurğulayıb.

Tramp həmçinin bildirib ki, iyunun 8-i səhər saatlarında İran nümayəndələri vasitəçilər üzərindən İsrailə hücumları dayandırmağa hazır olduqlarını bəyan edib və Vaşinqtondan İsrail rəhbərliyinə təsir göstərməyi xahiş ediblər. Prezidentin sözlərinə görə, o, Netanyahu ilə əlaqə saxlayaraq zərbələrin dayandırılmasına nail olub.

"Axios" nəşri yazır ki, Tramp və Netanyahu arasında telefon danışığı zamanı fikir ayrılıqları yaranıb. Lakin sonda İsrailin baş naziri İran tərəfinin yeni hücumlara başlamayacağı təqdirdə əməliyyatların dayandırılmasına razılıq verib.

ABŞ prezidenti əlavə edib ki, o, hələ də Tehranla razılaşmanın əldə olunmasında maraqlıdır və hesab edir ki, İran da belə bir sənədin imzalanmasına maraq göstərir.

İyunun 7-də İran, İsrail ordusunun Beyrut ətrafında “Hizbullah” ilə əlaqələndirilən obyektlərə zərbələr endirməsindən sonra İsrail ərazisini raket atəşinə tutub. Buna cavab olaraq İsrail İranın hərbi obyektlərinə hücumlar həyata keçirib. İyunun 8-də Tehran hücumları dayandırdığını bəyan edib, İsrail isə İrana qarşı zərbələri müvəqqəti dayandırdığını, lakin “Hizbullah”a qarşı əməliyyatların davam etdirildiyini açıqlayıb.

“Hizbullah” ABŞ və İsrail tərəfindən terror təşkilatı kimi tanınır.