Ukraynanın Kiyev vilayətində hərbi xidmətdən yayınan və hərbi hissəni özbaşına tərk edən şəxslərin saxlanıldığı binada işgəncə verilməsi ilə bağlı iddialar yayılıb. İddiaların ardınca yerli sakinlərlə Milli Qvardiya hərbçiləri arasında qarşıdurma baş verib.
Ukrayna Dövlət Təhqiqatlar Bürosu hadisə ilə əlaqədar cinayət işi başladıb.

“Reuters”in məlumatına görə, hadisə noyabrın 2-də Kiyev yaxınlığındakı Petropavlivska Borşahivka yaşayış məntəqəsində baş verib. Sosial şəbəkələrdə xüsusi yaşayış evinin zirzəmisində onlarla şəxsin qanunsuz saxlanıldığı, döyüldüyü və işgəncəyə məruz qaldığı, bəzi hallarda isə onların yaxınlarından pul tələb edildiyi iddia olunub.

Bundan sonra təxminən 100 nəfər binanın qarşısına toplaşaraq orada saxlanılan şəxslərin azad olunmasını tələb edib. Qarşıdurma zamanı etirazçılarla hərbçilər və hüquq-mühafizə orqanlarının əməkdaşları arasında insident yaşanıb.

“Euronews”un məlumatına görə, ilkin olaraq zirzəmidə təxminən 40 nəfərin saxlanıldığı bildirilsə də, sonradan həmin obyektin Ukrayna Milli Qvardiyasının müvəqqəti yerləşmə məntəqəsi olduğu açıqlanıb.
Milli Qvardiyanın 1-ci korpusunun “Azov” bölməsi binada yeni səfərbər edilmiş şəxslərin, həmçinin hərbi hissələrini icazəsiz tərk etdikdən sonra saxlanılaraq geri qaytarılmış hərbçilərin olduğunu bildirib. Açıqlamaya görə, onlar digər hərbi hissələrə göndərilmələrini gözləyiblər.

Milli Qvardiyanın komandanı Oleksandr Pivnenko dörd hərbçinin tibbi yardıma ehtiyac duyduğunu və xəstəxanaya yerləşdirildiyini bildirib. O, hərbçilərlə qanunsuz rəftarın qəbuledilməz olduğunu, yayılan məlumatların araşdırılacağını deyib.

Ukrayna prezident Ofisinin rəhbəri Kirilo Budanov isə genişmiqyaslı səfərbərlik səbəbindən bütün hərbçilərin yerləşdirilməsi üçün daimi dislokasiya məntəqələri və kazarmaların kifayət etmədiyini bildirib. Onun sözlərinə görə, bu səbəbdən müvəqqəti binalardan istifadə olunur. Budanov belə məntəqələrdə səlahiyyət həddinin aşılması və səfərbər olunan şəxslərə qarşı qanunsuz hərəkətlərə yol verilməsi hallarının olduğunu da etiraf edib.

O, Petropavlivska Borşahivkada baş verənlərdə kənar təsir ehtimalının da araşdırıldığını, təşkilatçıların müəyyən edilərək cəzalandırılacağını bildirib.
Ukrayna Təhlükəsizlik Xidmətinin rəhbər müavini İvan Rudnitskinin açıqlamasına görə, qarşıdurmada fəal iştirak edən təxminən 100 nəfər müəyyən edilib. “Euronews”un məlumatına əsasən, istintaqçılar insidentin hərbi hissəni icazəsiz tərk etmiş bir hərbçinin qaçırılması məqsədilə təşkil oluna biləcəyi ehtimalını da araşdırırlar.
Dövlət Təhqiqatlar Bürosu hadisə ilə əlaqədar hərbi vəzifəli şəxsin səlahiyyət həddini aşması maddəsi üzrə cinayət işi başladıb. Araşdırmaya Dövlət Təhqiqatlar Bürosu, Milli Qvardiya, Daxili İşlər Nazirliyi, Təhlükəsizlik Xidməti və Hərbi Ombudsman Aparatı cəlb olunub.