Azərbaycan prezidenti İlham Əliyev bu il yerli telekanallara ilk müsahibəsində işsizlik mövzusuna da toxundu. 

Əliyevin sözlərinə görə, işləmək istəyən Azərbaycanda özü üçün ya inşaatda, ya kənd təsərrüfatında, ya da başqa sahələrdə iş tapa bilər. 

“İşsizlik aşağı səviyyədədir, ancaq işsizlər var və bu, hər bir ölkədə var. İnkişaf etmiş ölkələrdə bizdən də böyük faizlə ölçülən işsizlik var. Amma mənim sözüm odur ki, bu gün Azərbaycan kimi ölkədə, geniş imkanları olan ölkədə iş tapmaq o qədər də çətin məsələ deyil. Sadəcə olaraq, bəziləri bəlkə də onlara təklif olunan işlərlə razı deyillər, ona görə iş axtarmağa davam edirlər”, - o əlavə edib. 

Deputat Fazil Mustafa da Milli Məclisin fevralın 2-də keçirilən plenar iclasında dövlət qurumlarında kütləvi ixtisarlar nəticəsində yüzlərlə insanın işsiz qaldığını deyib. 

“Bu insanlara ya alternativ iş yerləri təklif olunmalı, ya da sosial müdafiə mexanizmləri işə salınmalıdır. Təəssüf ki, bəzi hallarda işdən azad edilən şəxslərə başqa qurumlara yönləndirmə ilə bağlı deyilənlər praktikada öz təsdiqini tapmır, insanlar müraciət etdikdə həmin iş yerlərinin mövcud olmadığı ilə üzləşirlər”, - o qeyd edib. 

Bu ildən başlayaraq Bakı Metropoliteni, Bibiheybət Gəmi Təmiri Zavodu, TƏBİB kimi qurumlarda kütləvi ixtisarlar həyata keçirilib. 

“Toplum TV”-yə müraciət edən şikayətçilərin də çoxu məhz işsizlikdən gileylənir. 

Ağstafa sakini, İkinci Qarabağ Müharibəsi iştirakçısı Rəsul Ələsgərov deyir ki, müharibədə iştiraka görə ayrılan aylıq 80 manat təqaüddən başqa gəliri yoxdur. Onun sözlərinə görə, işlə təmin olunmaq üçün Ağstafa Rayon İcra Hakimiyyətinə və Dövlət Məşğulluq Agentliyinə dəfələrlə müraciət etsə də, faydası olmayıb. 

“Məşğulluq Agentliyinin işçisi mənə deyir ki, get Qarabağda fəhlə işlə. Biz almışıq torpaqları, məmur balaları getsinlər orada fəhləlik etsinlər də. Fəhləlik ancaq kasıbın alnına yazılmayıb ki?”, - o söyləyib. 

Dövlət Statistika Komitəsinin (DSK) bu il yanvarın 1-ə olan məlumatına görə, Azərbaycanda rəsmi qeydiyyatdan keçmiş işsizlərin sayı 239,800 nəfərdir. 

Müstəqil iqtisadçılar isə deyir ki, qeyri-rəsmi işsizlərin sayı bundan dəfələrlə çoxdur. 

DSK həm də bildirir ki, ötən ilin yanvar-sentyabr aylarında ölkədə 77 mindən çox yeni iş yeri yaradılıb. 

Dövlət Məşğulluq Agentliyinin (DMA) İdarə Heyətinin sədri Hasil Abbasov isə ötən ilin yekunlarına dair mətbuat konfransında deyib ki, ölkədə 60 mindən çox vakansiya var. 

“Toplum TV”-yə danışan iqtisadçı, Açıq Azərbaycan Təşəbbüsünün təsisçisi Zöhrab İsmayıl isə bildirir ki, bu rəqəm ölkədə əmək bazarının ümumi vəziyyətini tam əks etdirmək üçün yetərli deyil. 

“Əmək bazarını reallığa uyğun şəkildə əks etdirəcək göstərici median əmək haqqıdır [ümumi əməkhaqqı cədvəlinin tən ortasında qərarlaşan işçinin məvacibi - red.]. Hökumət isə bu göstəricini mütəmadi açıqlamır. Ən son 2022-ci ildə mətbuata deyilib ki, Azərbaycanda median əmək haqqının məbləği 410 manatdır. Bu isə o deməkdir ki, Azərbaycanda əmək haqqı alan insanların yarısı 410 manatdan az məvacib alır”, - o qeyd edib. 

İqtisadçı əlavə edir ki, hökumət yeni açılan iş yerlərinin sayını açıqlasa da, bağlanan iş yerlərinin sayını ictimaiyyətə açıqlamır. 

“Buna görə də, “iş var, insanlar işləmək istəmir” demək məsuliyyəti vətəndaşın üzərinə atmaqdır. Hətta elə bir problem varsa da, bununla məşğul olmaq Məşğulluq Agentliyinin öhdəliklərindən biridir. Biz görürük ki, inkişaf etmiş ölkələrdə məşğulluq orqanları vətəndaşlarla, o cümlədən miqrantlarla birbaşa işləyir. İş axtaranı işə hazırlamaq lazımdır. İxtisasartırma layihələri olmalıdır. Yeri gəlmişkən, bu iş yerləri haradadır? Məşğulluq orqanlarının saytında biz bunların elanını görürükmü?”, - o sual edib.