Həbsdə olan jurnalist Polad Aslanov 15 saylı Cəzaçəkmə Müəssisəsinin rəisi və müəssisə əməkdaşının ona qarşı fiziki zorakılıq tətbiq etdiyini iddia edib.

Jurnalistin həyat yoldaşı Gülmirə Aslanova bu barədə oktyabrın 29-da Ədliyyə Nazirliyi Penitensiar Xidmətinin rəisi Sahib Rzayevin qəbulundan sonra məlumat verib.

Gülmirə Aslanovanın sözlərinə görə, o, Polad Aslanovla görüşünə şərait yaradılmasını istəyib. Lakin Sahib Rzayev görüşə icazə verilməyəcəyini, yalnız jurnalistin zəng edə biləcəyini deyib.

Telefon danışığı zamanı Polad Aslanov oktyabrın 12-də - aclıq aksiyasına başladığı gün 15 saylı Cəzaçəkmə Müəssisəsinin rəisi Ramiq Nəsibovun otağında fiziki zorakılığa məruz qaldığını bildirib. Gülmirə Aslanovanın sözlərinə görə, jurnalist hadisəni belə təsvir edib:

“Yeni təyin olunmuş Teymur adlı əməkdaş rəisin otağında qolumu arxaya buraraq məni yerə yıxdı, rəis Ramiq Nəsibov isə məni döydü”.

“Toplum TV” Polad Aslanovun döyüldüyü iddiası ilə bağlı Penitensiar Xidmətin mövqeyini öyrənə bilməyib.

G.Aslanova bildirib ki, P.Aslanov aclıq aksiyasını dayandırmayacağını və tələbləri yerinə yetirilənədək mübarizəsini davam etdirəcəyini deyib.

Aslanovun sözlərinə görə, onunla birlikdə 15 saylı Cəzaçəkmə Müəssisəsindən gətirilən Zeynal Bayramov və 11 saylı Cəzaçəkmə Müəssisəsindən gətirilən Fuad Ələsgərov da aclıq aksiyasını davam etdirirlər. Onların hazırda Penitensiar Xidmətin Müalicə Müəssisəsində, cərimə kamerasında bir-birindən təcrid olunmuş vəziyyətdə saxlanıldığı bildirilir.

Polad Aslanov Azərbaycan məktəblərində hicabla bağlı məhdudiyyətlərə etiraz olaraq oktyabrın 12-də aclıq aksiyasına başlayıb. Gülmirə Aslanovanın sözlərinə görə, həmin gün müəssisə rəisi Ramiq Nəsibovun qərarı ilə jurnalistə beş günlük cərimə kamerası (“kars”) cəzası verilib.

Nazirlər Kabinetinin sentyabrın 21-də qəbul etdiyi qərarla dövlət ümumi təhsil müəssisələrində şagirdlər üçün geyim qaydaları təsdiqlənib. Qaydalarda hicabın qadağan olunduğu birbaşa qeyd edilməsə də, geyim formalarının dünyəvilik prinsipinə uyğun olması nəzərdə tutulur. Oktyabrın 6-da müəllimlər üçün də analoji qərar qəbul edilib.

Polad Aslanov 2019-cu il iyunun 12-də həbs olunub. O, Cinayət Məcəlləsinin 274-cü maddəsi (dövlətə xəyanət) ilə təqsirli bilinərək 13 il müddətinə azadlıqdan məhrum edilib. Jurnalist ittihamı qəbul etmir və peşə fəaliyyətinə görə cəzalandırıldığını bildirir.