Avropa İnsan Hüquqları Məhkəməsi (AİHM) hazırda həbsdə olan hüquq müdafiəçisi Rüfət Səfərovun şikayəti əsasında Azərbaycan hökumətinə qarşı qərar verib. 

Məlumatı jurnalisti bu işdə təmsil edən vəkillərdən biri Fariz Namazlı yayıb.

AİHM fevralın 17-də R.Səfərovun 2016-cı ildə rüşvət ittihamı ilə həbs olunmasından verdiyi şikayətə baxıb. 

Hüquq müdafiəçisi ərizəsində həmin vaxt saxta sübutlar əsasında məhkum edildiyini bildirib. O əlavə edib ki, ittihamlara etiraz etmək və öz lehinə sübut təqdim etmək imkanı verilməyib, yerli məhkəmələr isə arqument və müraciətlərini kifayət qədər əsaslandırmadan rədd edib.

AİHM qərarında qeyd edib ki, ərizəçi ona qarşı irəli sürülmüş sübutların etibarlılığına etiraz etməyə çalışıb, lakin yerli məhkəmələr bu arqumentləri və onları dəstəkləyən sübutları, eləcə də ərizəçinin müvafiq müraciətlərini nəzərə almayıb. 

Məhkəmə hesab edib ki, ərizəçiyə qarşı istifadə olunan sübutların etibarlılığı yerli məhkəmələr tərəfindən yoxlanılmadığı üçün onlara verilən qiymət icraatın ədalətliliyi ilə bağlı ciddi suallar doğurur.

Bununla da, məhkəmə iş üzrə Avropa İnsan Hüquqları Konvensiyasının 6-cı maddəsinin 1-ci və 3-cü bəndlərinin pozuntusunu tanıyıb. 1-ci bənddə hər kəsin müstəqil və qərəzsiz, qanunla yaradılmış məhkəmə tərəfindən ağlabatan müddət ərzində ədalətli və açıq məhkəmə araşdırması hüququna malik olduğu göstərilir. 3-cü bənddə isə deyilir ki, cinayət əməlində təqsirləndirilən şəxslərə ittiham aydın dildə izah olunmalıdır, onlar öz seçdikləri və ya dövlət hesabına vəkillə, o cümlədən digər hüquqlarla təmin olunmalıdırlar.

Məhkəmə Azərbaycan hökumətinin ərizəçiyə mənəvi zərərə görə 4000, hüquqi xərclərə görə 1000 avro təzminat ödəməsinə qərar verib. 

R.Səfərov 2015-ci ilin dekabrında Zərdab Rayon Prokurorluğunun müstəntiqi vəzifəsindən istefa verdikdən sonra rüşvət ittihamı ilə həbs olunmuşdu. Ona 9 il həbs cəzası kəsilsə də, 2019-cu ilin martında əfv sərəncamı ilə azadlığa buraxılmışdı.

R.Səfərov 2019-cu ildə həbsdən çıxdıqdan yenidən həbs edilənə kimi hüquq müdafiəçisi kimi fəaliyyət göstərib. 

2024-cü il dekabrın 3-də yenidən saxlanılan Rüfət Səfərova qarşı Cinayət Məcəlləsinin 178.3.2 (dələduzluq, külli miqdarda ziyan vurmaqla törədildikdə), 127.2.3-cü (qəsdən sağlamlığa az ağır zərər vurma)  və 221.1 (xuliqanlıq) maddələri ilə ittiham irəli sürülüb.

O, ittihamları rədd edir, həbsinin siyasi sifariş olduğunu bildirir.