Avropa Mətbuat Azadlığı Mərkəzi (ECPMF) "Toplum TV işi" üzrə verilən məhkəmə hökmünü qınayan bəyanat yayıb. 

İyulun 28-də verilən bəyanatda deyilir ki, hökm Azərbaycanda müstəqil jurnalistikaya qarşı "davam edən repressiyaların ciddi şəkildə dərinləşdiyini göstərir və ölkədə artıq xeyli daralmış azad və tənqidi jurnalistika üçün mövcud məkanı daha da məhdudlaşdırır." 

"İttihamlar Azərbaycanın məhdudlaşdırıcı media qanunvericiliyindən qaynaqlanır. Həmin qanunvericilik müstəqil media qurumlarının xarici maliyyə dəstəyi almasını faktiki olaraq mümkünsüz edir. Maliyyələşmə mexanizmlərinin kriminallaşdırılması isə hakimiyyət tərəfindən müstəqil jurnalistikanı hədəfə almaq və tənqidi səsləri susdurmaq üçün istifadə olunan alətə çevrilib", - deyə qeyd olunub. 

ECPMF bu hökmü Azərbaycan hakimiyyətinin müstəqil jurnalistikanı "susdurmaq məqsədilə cinayət mühakiməsi sistemindən sui-istifadə etməsinin növbəti nümunəsi" hesab edir.

"Toplum TV işi müstəqil mediaya qarşı daha geniş repressiya kampaniyasının tərkib hissəsidir. Bu kampaniya çərçivəsində Abzas Media, Meydan TV və Kanal 13 kimi media qurumları da hədəfə alınıb, jurnalistlər həbsə məruz qalıb, uzunmüddətli istintaq təcridində saxlanılıb, məhkəmə təqibləri ilə üzləşib və siyasi motivli ittihamlarla mühakimə olunublar", - deyə əlavə olunub. 

ECPMF Azərbaycan hakimiyyətini "peşə fəaliyyətinə görə həbs edilən bütün jurnalistləri və media işçilərini dərhal və qeyd-şərtsiz azad etməyə, siyasi motivli hökmləri ləğv etməyə və müstəqil mediaya qarşı təqiblərə son qoymağa" çağırıb. 

Təşkilat eyni zamanda Avropa İttifaqı, Avropa Şurası və Avropa Təhlükəsizlik və Əməkdaşlıq Təşkilatını Azərbaycanı beynəlxalq öhdəliklərinə əməl etməyə məcbur etmək istiqamətində səylərini davam etdirməyə çağırıb. 

İyulun 27-də “Toplum TV işi“ üzrə təqsirləndirilən şəxslərə hökm oxunub.

Hökmə əsasən, hər biri 2 il 6 ay müddətinə müəyyən vəzifə tutmaq hüququndan məhrum edilməklə, Demokratik Təşəbbüslər İnstitutunun rəhbəri Akif Qurbanov 15, “Toplum TV”-nin həmtəsisçisi Ələsgər Məmmədli 14, siyasətçi Ruslan İzzətli 15, IDI əməkdaşları Ramil Babayev 13, Əli Zeynal 14, İlkin Əmrahov 13, “Toplum TV” əməkdaşları Müşfiq Cabbar 13, Fərid İsmayılov 12, Elmir Abbasov isə 11 il 11 ay 28 gün müddətinə azadlıqdan məhrum edilib. E. Abbasov məhkəmə zalında həbs olunub.

Bundan başqa, təqsirləndirilən şəxslərlə bağlı qaldırılan mülki iddia təmin edilib. Məhkəmə dövlət ittihamçısının vəsatətini təmin edərək üzərinə həbs qoyulmuş avtomobillərin və evlərin müsadirə olunmasına qərar verib.

2024-cü il martın 6-da “Toplum TV”-nin ofisində və daha bir neçə ünvanda Daxili İşlər Nazirliyi tərəfindən əməliyyat keçirilib.

Həmin vaxt bu işlə bağlı 7 nəfər həbs olunmuşdu. Jurnalist Fərid İsmayılov və Elmir Abbasov barəsində əvvəlcə alternativ qətimkan tədbiri seçilsə də, 2025-ci ilin yanvarında Fərid İsmayılov da həbs edilmişdi.

“Toplum TV işi” üzrə təqsirləndirilən şəxslər öncə qaçaqmalçılıqda ittiham edilsələr də, sonradan ittiham ağırlaşdırılıb. Bu iş üzrə həbs olunan şəxslər ittihamları rədd edir, fəaliyyətlərinə görə siyasi sifariş əsasında həbs olunduqlarını bildirirlər.