Fevralın 12-də Bakı Ağır Cinayətlər Məhkəməsində Vətəndaş Hüquqları İnstitutunun həbsdə olan direktoru, hüquq müdafiəçisi Bəşir Süleymanlının növbəti məhkəmə prosesi keçirilib.

Posesdə çıxış edən B.Süleymanlı ona qarşı irəli sürülən ittihamları qəbul etmədiyini, ittihamların əsassız olduğunu deyib.

B.Süleymanlı fəaliyyətini qanuni yollarla həyata keçirdiyini söyləyib. O, xidmət müqaviləsi ilə ABŞ-nin Beynəlxalq İnkişaf Agentliyindən (USAID) alınan vəsaitlə Azərbaycanın bölgələrində müharibədən əziyyət çəkən şəxslərə, şəhid ailələrinə və müharibə iştirakçılarına pulsuz hüquqi yardım edildiyini bildirib. 

B.Süleymanlı daha sonra Milli Məclisin İnsan hüquqları komitəsinin sədri Zahid Orucun 2024-cü il martın 15-də Milli Məclisdə çıxışı zamanı Azərbaycan hökumətinə ABŞ və Avropa İttifaqından "işğalın nəticələrini aradan qaldırmaq üçün kömək istəməyi" təklif etdiyini xatırladıb. Z.Oruc həmin çıxışında deyib ki, “əgər milli tikinti şirkətlərinə onların inamı azdırsa, USAID-in xətti ilə öz tikinti qurumlarına sifariş versinlər”.

"Necə olur ki, bir tərəfdən deputat, Sosial Tədqiqatlar Mərkəzinin İdarə Heyətinin rəhbəri Zahid Oruc USAID-in işğaldan azad olunmuş ərazilərdəki bərpa işlərinə cəlb edilməsindən danışır, digər tərəfdən isə istintaq QHT-lərin USAID-dən xidmət müqaviləsi və bank vasitəsi ilə vəsait almalarını cinayət əməli hesab edir?", - o sual edib. 

B.Süleymanlı Z.Orucun həmin açıqlamasının çap formasını da məhkəməyə təqdim edib.

Hüquq müdafiəçisi Ədliyyə Nazirliyinin, Səhiyyə Nazirliyinin və başqa bir neçə dövlət qurumunun USAİD-dən vəsait aldıqlarını da məhkəmənin diqqətinə çatdırıb.

B.Süleymanlı bildirib ki, istintaq orqanı ittiham aktında onun Böyük Britaniya və Şimali İrlandiya Krallığının Azərbaycandakı səfirliyinin "şəxsiyyətləri istintaq tərəfindən müəyyən edilməmiş şəxsləri ilə" əlbir olaraq onlardan qrant aldığını yazıb.

B.Süleymanlı və vəkili vəsatət verib ki, məhkəmə adıçəkilən səfirliyə sorğu göndərərək onunla xidmət müqaviləsi bağlayan şəxslərin kimliyini müəyyənləşdirsin. Məhkəmə vəsatəti təmin etməyib.  

Sonra hüquq müdafiəçisi Samir Kazımlı məhkəmədə ifadə verib. O, B.Süleymanlının qanun pozuntusuna yol vermədiyini, onun rəhbəri olduğu təşkilatın cəmiyyətin müxtəlif qruplarına pulsuz hüquqi yardım etdiyini bildirib.

Növbəti məhkəmə iclası martın 12-i saat 17:00-a təyin olunub.

Bəşir Süleymanlı ötən ilin martında saxlanılıb və ona qarşı Cinayət Məcəlləsinin 313-cü (Vəzifə saxtakarlığı), 193-1.3.2-ci (Cinayət yolu ilə əldə edilmiş pul vəsaitlərini və ya digər əmlakı leqallaşdırma, xeyli miqdarda törədildikdə) və 308.2-ci (vəzifə səlahiyyətlərindən sui-istifadə) maddələri ilə ittiham irəli sürülüb. 

“QHT işi” üzrə həbslər 2025-ci ilin martında başlayıb. İlk olaraq Vətəndaş Hüquqları İnstitutunun rəhbəri Bəşir Süleymanlı və Seçki Müşahidə Alyansının icraçı direktoru Məmməd Alpay saxlanılıb. Apreldə ictimai fəal Asəf Əhmədov, sosial işçi Zamin Zəki və Əhməd Məmmədzadə də eyni ittihamla həbs edilib.

İqtisadçı Qalib Bayramov və hüquq müdafiəçisi Nərgiz Muxtarova barəsində polisin nəzarəti altına vermə tədbiri seçilib.

Onlara qarşı cinayət yolu ilə əldə edilmiş əmlakı leqallaşdırma, vəzifə səlahiyyətlərindən sui-istifadə və saxtakarlıq maddələri üzrə ittiham irəli sürülüb.

İstintaqa 100-dən çox şəxs, o cümlədən beynəlxalq donor təşkilatlarının əməkdaşları və bəzi hökumətyönlü QHT rəhbərləri cəlb olunub.

Bundan başqa, “Hüquq və İnkişaf” İB rəhbəri Hafiz Həsənov, sabiq GMF məsləhətçisi Mehriban Rəhimli və digərləri barəsində həbsə alternativ qətimkan tədbiri seçilib.

Ölkə xaricində olan Sübhan Həsənli və Aytac Ağazadə isə axtarışa verilib.