Ötən ilin iyununda paytaxtın "Baksol yolu" adlanan ərazisində 28 yaşlı gəncin ölümü ilə nəticələnən yol çöküntüsü faktı üzrə başlanmış cinayət işi üzrə məhkəmənin növbəti prosesi keçirilib.

APA-nın məlumatına görə, martın 3-də Nərimanov Rayon Məhkəməsində hakim Gültəkin Əsədovanın sədrliyi ilə keçirilən iclasda şahidlər ifadə veriblər.

Hadisə yerinin yaxınlığında obyekti olan şahid Səyyar Nuriyev bildirib ki, ərazidə çökmələr ötən ilin əvvəlindən baş verirdi və o, məsələ ilə bağlı bir neçə dəfə “Azərsu”nun qaynar xəttinə müraciət edib: “Hətta onlar yolun qarşısında təmir aparanda yaxınlaşıb problemi demişəm. Deyiblər ki, ərazidə təmir işləri apara-apara gəlirlər, yavaş-yavaş düzələcək. Yayılan məlumatlara görə, quraşdırılan dəmir məhəccərləri biz götürmüşük. Bunlar yalandır. Quraşdırılan dəmirlər az idi və ərazini tam əhatə etsin deyə ətrafına lent dolamışdılar. Həmin dəmirlər yerə tam bərkidilməmişdi. Onlar məhəccərlərin yerini mütəmadi özləri dəyişirdilər, aparırdılar".

Təqsirləndirilən, Bakı Su Kanal İdarəsinin sahə rəisi Azər Cümşüdov isə bildirib ki, məhəccərlər kifayət qədər olduğu üçün yerinin dəyişdirilməsinə ehtiyac olmayıb: "Sahibkar yalan deyir. Biz dəmirləri götürməmişik. Bizim digər ərazilərə kifayət edəcək qədər dəmirimiz vardı. Ora diktin tökülməsi təhlükə yaradırdı. Əgər çuxur olsa, bəlkə zərərçəkən görüb ora yaxınlaşmazdı. Hadisə baş verdikdək sonrakı gün bizim işçilər gördü ki, dəmirləri sahibkarlar yığıb öz obyektlərinə qoyublar. Hətta hazırda həmin yerə təmir materialları yığılıb".

Şahid kimi ifadə verən digər sahibkar Asif Həbibov isə bildirib ki, hadisə baş verən ərazi onun da obyektinə yaxındır: "Hadisənin tam şahidi olmamışam. Amma təqribən iki aydan çox o ərazi o vəziyyətdə qalıb. Mən də məcbur oldum, öz dəmirlərimlə ərazini mühafizəyə aldım. Bundan 1-2 həftə sonra onlar gəlib ərazini məhəccərlə bağladılar. Bu prosesdən 3-4 gün sonra öz dəmirlərimi ərazidən götürdüm. Çünki mən onları kirayə verməklə pul qazanırdım".

Növbəti proses martın 17-nə təyin edilib.

Ötən il iyun ayında "Baksol yolu" ərazisində yolun çökməsi nəticəsində kanalizasiyaya düşən Cümşüd Cümşüdlünün meyiti iyunun 28-də Hövsan qəsəbəsində kollektorda tapılmışdı.