Müstəqil ekspertiza həbsdə olan iqtisadçı Fazil Qasımovun adından verilmiş ərizədəki imzanın ona məxsus olmadığına qərar verib. 

F.Qasımovun ailə üzvlərinin "Toplum TV"-yə dediyinə görə, iqtisadçı 2023-cü ilin sentyabrında Daxili İşlər Nazirliyinin (DİN) müstəntiqi Yusif Yusifova onun adından ünvanlanmış ərizənin ona məxsus olmadığını bildirib. Həmin ərizədə F.Qasımovun müdafiəsinə qoşulmuş vəkillərdən imtina etdiyi yazılıb. 

F.Qasımov iddia edirdi ki, ərizəyə onun adından müstəntiq özü imza atıb. Bu barədə iqtisadçının vəkilinin Alternativ Ekspertiza Mərkəzinə göndərdiyi sorğuya aprelin 14-də cavab gəlib. 

F.Qasımovun ailə üzvlərinin "Toplum TV" ilə paylaşdığı rəydə ekspert imzanın iqtisadçı deyil, başqa şəxs tərəfindən düşünülmüş formada icra edildiyini qeyd edib. 

F.Qasımov yeni ekspertiza rəyindən sonra yenidən Ali Məhkəməyə müraciət edib. İqtisadçı müdafiəçilərinin prosesdən kənarlaşdırılması ilə ibtidai istintaq dövründə hüquqlarının "kobud surətdə pozulduğunu" bildirib.

F.Qasımov buna görə saxta olduğu deyilən ərizənin yazıldığı tarixdən etibarən Y.Yusifov tərəfindən aparılmış bütün istintaq hərəkətlərinin qanunsuz hesab edilməsini və işin birinci instansiya məhkəməsinə qaytarılmasını tələb edib. 

İqtisadçı Qubad İbadoğlunun işi ilə bağlı 2023-cü ildə Türkiyədə saxlanılaraq Azərbaycana gətirilən Fazil Qasımov ötən ilin martında 9 il müddətinə azadlıqdan məhrum edilib. 

O, Cinayət Məcəlləsinin satış məqsədilə hazırlama, o cümlədən saxta pul və ya xarici valyuta əldə etmə və ya satma - eyni əməllər mütəşəkkil dəstə tərəfindən törədildikdə maddəsi ilə ittiham olunub.

Özü isə ittihamı rədd edir. 

Qubad İbadoğlu 2023-cü ilin iyulunda həbs olunub, satış məqsədi ilə hazırlama, o cümlədən saxta pul və ya xarici valyuta əldə etmə və ya satma və dini ekstremist materialları hazırlama, saxlama və ya yayma maddələri ilə ittiham olunur. O da ittihamları rədd edir. 

2024-cü ilin aprelində Q.İbadoğlu ev dustaqlığına buraxılıb, mayda isə bu qətimkan tədbiri də dəyişdirilib və o, polis nəzarətinə verilib.